Zeremi 27 - Labib An Kreol Seselwa

En Siny Soumisyon lo Likou Zeremi

¹ Sedesyas, garson Zozyas ti'n fek vin lerwa Zida, kan Zeremi ti ganny sa parol, sorti kot SENYER:

² La sa ki SENYER i deklare: Prepar bann sang an kwir ek bann bar dibwa ki ou ava met lo ou likou.

³ Apre, ou ava anvoy sa bann sang ek sa bann bar kot bann lerwa rwayonm Edonm, Moab, Amonn, Tir ek Sidon, atraver zot anbasader ki'n vin Zerizalenm kot Sedesyas, lerwa Zida.

⁴ La sa ki ou ava ordonn zot dir avek zot bann met: La en mesaz sorti kot SENYER liniver, Bondye Izrael. La sa ki zot ava dir avek zot lerwa:

⁵ Mwan ki'n kre later, zonm ek bann zannimo ki viv lo later. Tou sa ki mon'n kree avek mon lafors e mon savwar fer, mon partaz li avek sa ki fer mwan plezir.

⁶ Mwan menm ki'n met tou bann nasyon anba pouvwar mon serviter, Naboukodonozor, lerwa Babilonn. Mon'n menm met tou bann zannimo sovaz anba son pouvwar pour servi li.

⁷ Tou bann nasyon pou servi li, son garson ek son pti zanfan, ziska ler son zour ava vini. Alor, bann nasyon ek bann lerwa pli pwisan ki li pour fer li lesklav.

⁸ Si en nasyon oubyen en rwayonm i refize soumet li anba lerwa Naboukodonozor, lerwa Babilonn; si i refize met son likou anba fardo lerwa Babilonn, alor mon pou pini sa nasyon par lager, lafanmin, lepidemi, ziska ki i ava'n detri li konpletman, SENYER i deklare.

⁹ Zot pa bezwen ekout zot bann profet ni sa bann ki predir lavenir, ni zot prop rev, oubyen envok lespri dimoun mor, ni fer mazi. Zot tou, zot pe dir ou: Ou pa pou tonm anba pouvwar lerwa Babilonn.

¹⁰ Annefe, tou sa ki zot anons ou koman profesi, i en bann mansonz. Si ou ekout zot, mon pou fer ou ganny deporte, mon pou anvoy ou lwen ek ou pei e ou pou disparet konpletman.

¹¹ Me, tou nasyon ki soumet li anba pouvwar lerwa Babilonn e ki servi li, mon pou les li lo son later ki i ava kiltive e kot i ava reste, SENYER i deklare.

¹² Mon ti transmet menm mesaz avek Sedesyas, lerwa Zida: Aksepte sa bar dibwa ki lerwa Babilonn i met lo ou likou. Servi li ek son pep e ou ava reste vivan.

¹³ Akoz ou avek ou pep, zot devre mor dan lager, avek lafanmin oubyen lepidemi, parey SENYER in dir pou arive avek nenport ki nasyon ki pa soumet li anba lerwa Babilonn?

¹⁴ Pa bezwen ekout sa bann profet ki dir ou: Ou pa pou tonm anba pouvwar lerwa Babilonn. Sa ki zot pe anonse i en mansonz.

¹⁵ Mon pa'n anvoy zot, SENYER i deklare; me zot pe anons mansonz ler zot pe koz lo mon non. Si ou ekout zot, mon pou deport ou, e ansanm avek sa bann profet manter, zot pou ganny touye.

¹⁶ Apre, mon ti dir bann pret ek lepep, sa ki SENYER i deklare: Pa bezwen ekout sa bann profet ki pe dir ki bann lobze ki servi dan tanp SENYER, pou byento retournen sorti Babilonn. Sa ki zot pe anonse i en mansonz.

¹⁷ Pa ekout zot. Servi lerwa Babilonn e zot ava reste vivan. Akoz sa lavil i bezwen ganny detri?

¹⁸ Si zot vreman profet, si zot vreman anons en parol sorti kot SENYER, alor, plito priy SENYER liniver pour ki bann lobze ki'n reste dan tanp SENYER, dan pale lerwa Zida e dan Zerizalenm, pa ganny anmennen Babilonn.

¹⁹ Akoz, la sa ki SENYER liniver i deklare konsernan bann pilye, gran basen delo, bann pyedestal, ek lezot lobze ki'n reste dan sa lavil.

²⁰ Annefe, kan i ti anmenn Yoyakin, garson Yoyakim, lerwa Zida, avek bann sef dan Zida e dan Zerizalenm, Naboukodonozor, lerwa Babilonn pa ti pran tousala depi Zerizalenm pour anmenn Babilonn.

²¹ La sa ki SENYER liniver, Bondye Izrael, i deklare konsernan bann lobze ki'n reste dan tanp SENYER, dan pale rwayal Zida e dan Zerizalenm:

²² Sa bann lobze pou ganny anmennen Babilonn. Zot pou reste laba ziska zour mon ava deside retourn zot isi, SENYER ki deklare.