Zeremi 26 - Labib An Kreol Seselwa

Zeremi I Ganny Menase avek Lanmor

¹ Zis apre ki Zoyakim, garson Zozyas ti vin lerwa Zida, SENYER ti koz avek mwan:

² La sa ki mwan, SENYER, mon deklare: Al met ou debout dan lakour tanp e anons tou sa ki mon'n demann ou dir sa pep ki sorti depi bann lavil Zida pour vin ador mwan. Pa mank okenn parol dan mon mesaz.

³ Petet, enn apre lot, lepep ava ekoute e sanz zot move mannyer fer. Alor, mon pa ava detri zot parey mon ti'n deside, pour zot bann move mannyer fer.

⁴ Ou ava dir zot: Si ou pa obei mon lalwa ki mon met devan ou; si ou pa swiv sa ki mon'n aprann ou,

⁵ e ekout parol bann profet, mon bann serviter ki mon'n touzour anvoy kot ou, menm si ou pa'n ekout zot;

⁶ alor, mon pour detri sa tanp parey mon ti fer kraz sa enn ki Silo e fer Zerizalenm vin en malediksyon pour tou bann nasyon ki lo later.

⁷ Bann pret, bann profet ek lepep antye, ti antann Zeremi pandan ki i ti pronons sa bann parol dan tanp SENYER.

⁸ Kan Zeremi ti'n fini dir tou sa ki SENYER ti'n ordonn li dir avek lepep, bann pret, bann profet e lepep antye ti sezi li e zot ti kriye: Ou merit lanmor!

⁹ Akfer ou profetize lo non SENYER, konmkwa sa tanp pou fini parey sa enn Silo e ki Zerizalenm pou ganny detri e pa pou reste okenn zabitan? Tou dimoun ti rasanble otour Zeremi dan tanp SENYER.

¹⁰ Kan bann sef dan Zida ti antann sa ki'n arive, zot ti depese pou sorti dan pale lerwa pour al dan tanp. Zot ti rasanble kot laport tanp ki apel laport Nef.

¹¹ Bann pret ek bann profet ti dir bann sef ek lepep antye, “Sa zonm i merit lanmor akoz in koz kont Zerizalenm. Zot tou, avek zot prop zorey, zot in tande sa ki i'n dir.”

¹² Alor, Zeremi ti reponn bann sef ek lepep antye, “SENYER ki'n anvoy mwan anons tou sa ki zot in antann mwan dir kont sa tanp e kont Zerizalenm.

¹³ Aprezan, zot devre sanz zot mannyer viv e zot mannyer fer. Ekout lavwa SENYER zot Bondye. Konmsa, SENYER ava sanz son lide. I pa ava anvoy lo zot sa bann maler ki i ti'n deside kont zot.

¹⁴ Kanta mwan, mon lavi i dan zot lanmen. Fer avek mwan sa ki zot krwar i byen e zis.

¹⁵ Me en keksoz i sir: Si zot touy mwan, zot, ansanm avek lepep, zot pou responsab lanmor en zonm inosan, akoz SENYER in vreman anvoy mwan pour dir zot sa bann parol.”

¹⁶ Bann sef ek lepep ti dir bann pret ek bann profet: Sa zonm in koz lo non SENYER nou Bondye; i pa merit lanmor.

¹⁷ Detrwa bann ansyen ti leve e zot ti dir avek lepep ki ti'n rasanble:

¹⁸ Kan Ezekyas ti lerwa Zida, Mise ki sorti Moreset, ti dir avek pep Zida: La sa ki SENYER liniver i deklare: Siyon pou ganny laboure parey en later; Zerizalenm pou vin en ta ros, e kolin kot tanp in ganny konstri, pour vin en oter kouver avek brousay.

¹⁹ Eski lerwa Ezekyas ek lepep Zida ti fer Mise ganny touye pour sa? O kontrer, Ezekyas ti montre en gran respe pour SENYER e fer tou pour li ganny son faver. Alor, SENYER ti sanz son lide lo bann dezas ki i ti dir i pour anvoy lo zot. Fer atansyon ki nou pa anmenn en gran dezas lo nou menm.

Zoyakim I Fer Touy Profet Ouri

²⁰ Dan sa letan, ti annan en lot zonm ki ti apel Ouri. I ti garson Semaya, sorti dan lavil Kiryat-Yearim. Li osi, parey Zeremi, i ti koz lo non SENYER kont sa lavil ek sa pei.

²¹ Kan lerwa Zoyakim ek tou son bann vayan gerye ek son bann sef ti antann sa ki Ouri ti'n dir, zot ti esey fer touy li. Ler Ouri ti antann sa, i ti per. Alor i ti sove Lezip.

²² Me lerwa Zoyakim ti anvoy Elnatan, garson Akbor ek detrwa lezot zonm avek li ziska Lezip.

²³ Zot ti atrap Ouri e anmenn li kot lerwa Zoyakim ki ti touy li par en kou lepe, e zet son kadav dan en simityer piblik.

²⁴ Sepandan, Ahikanm, garson Safann, ti protez Zeremi e anpese ki i pa tonm dan lanmen lepep pour zot touy li.