Zeremi 23 - Labib An Kreol Seselwa

Senyer Pou Sov Son Pep

¹ La sa ki SENYER i deklare: Maler lo sa bann berze ki detri e ki dispers bann mouton dan mon troupo!

² Akoz tousala, la sa ki SENYER, Bondye Izrael, i deklare kont sa bann berze ki sipoze pran swen son pep: Zot pa'n okip mon troupo; zot in dispers li dan tou kote. Alor, mwan ki pou okip zot e pini zot mannyer fer, SENYER i deklare.

³ Mwan menm ki pou rasanble leres mon troupo, dan tou sa bann pei kot mon'n sas zot; mon pou fer zot retourn dan zot pei kot zot ava fer bokou zanfan.

⁴ Mon pou donn zot bann bon berze pour diriz zot, ki pou pran swen avek zot. Avek zot, mon pep pou nepli per, ni konn lafreyer; pa pou annan enn ki pou manke; SENYER i deklare.

Senyer I Promet En Lerwa, En Vre Berze

⁵ La sa ki SENYER i deklare: Bann zour pe vini, kan mon pou fer paret en vre desandan David. En lerwa ki pou renny avek disernman e ki pou fer respekte lalwa ek lazistis dan pei.

⁶ Pandan son renny, rwayonm Zida pou ganny libere e pep Izrael pou viv dan lape. I pou ganny apele: SENYER ki nou lazistis.

⁷ Wi, sirman sa zour pe vini, SENYER i deklare, kan dimoun pou nepli dir: Mon fer serman par SENYER ki vivan ki'n fer nou, bann Izraelit, sorti Lezip,

⁸ me: Mon fer serman par SENYER ki vivan, ki'n fer pep Izrael sorti dan pei Nor e partou dan lezot pei kot i ti sas zot, e in fer zot retourn lo zot prop later.

Mesaz Zeremi kont bann Profet

⁹ La sa ki SENYER i deklare lo size bann profet: Mon leker i fer mal. Tou mon lekor pe tranble. Mon parey en zonm sou, en zonm ki'n tro bwar, akoz tou sa ki SENYER in fer, akoz bann parol ki i'n dir mwan.

¹⁰ Sa pei i ranpli avek dimoun ki komet adilter. Akoz malediksyon Bondye, pei i an dey, e zerb i konpletman sek. Zot taye pour fer sa ki mal e zot servi zot kouraz pou fer sa ki devret.

¹¹ Ni bann profet, ni bann pret pa montre respe pour mwan. Mon'n war tou sa bann move aksyon ki zot komet menm dan tanp, SENYER i deklare.

¹² Pour sa rezon, mon pou fer zot glise dan semen. Zot pou bat ek kanmarad dan fernwanr e zot pou tonbe. Mon pe anmenn maler lo zot; letan zot pinisyon in arive, SENYER i deklare.

Bann Profet Zerizalenm I Pir ki Profet dan Samari

¹³ Mon'n war pese ki bann profet dan Samari ti fer: Zot ti profetize lo non Baal e zot in anmenn Izrael, mon pep, lo move semen.

¹⁴ Me mon'n war bann profet dan Zerizalenm fer keksoz degoutan: Zot komet adilter e zot viv dan mansonz. Zot ankouraz dimoun kontinyen fer sa ki mal, e personn pa sanz son mannyer fer. Pour mwan, zot osi move ki bann zabitan Sodonm ek Gomor.

¹⁵ Alor, la sa ki SENYER liniver i deklare konsernan sa bann profet: Mon pou fer zot manz margoz anmer e bwar delo anpwazonnen. Akoz sa bann profet Zerizalenm, ki pei antye in ganny profannen.

Mansonz bann Profet

¹⁶ La sa ki SENYER liniver i deklare: Pa ekout parol bann profet. Pa les zot tronp ou avek en bann fo promes. Sa ki zot pe dir i zot prop lenvansyon; zot pa pe anons mesaz sorti kot SENYER.

¹⁷ Zot osi dir avek bann dimoun ki napa respe pour mwan: SENYER in dir ki tou pou al byen pour zot. Avek sa bann ki reste dan zot lantetman, ki swiv zot prop mannyer fer, zot dir: Maler pa pou tonm lo zot.

¹⁸ Me, lekel parmi sa bann profet ki'n deza konn sa ki SENYER i mazinen dan sekre? Lekel parmi zot in deza tande, oubyen konpran sa ki SENYER i dir?

¹⁹ Lakoler SENYER i parey en tanpet, en divan tourbiyon lo latet bann move dimoun.

²⁰ Sa lakoler SENYER pa pou arete ziska ki SENYER in akonpli tou sa ki i ti annan lentansyon fer. Plitar, zot ava konpran tousala.

²¹ Mon pa'n anvoy okenn sa bann profet, pourtan zot pe taye. Mon pa ti donn zot okenn mesaz; me zot in koz an mon non.

²² Si zot ti konn sa ki mon mazinen dan sekre, zot ti ava'n proklanm mon mesaz avek mon pep. Konmsa, zot ti ava'n kapab fer lepep sanz son mannyer viv, e son move mannyer fer.

²³ La sa ki SENYER i deklare: Mwan menm Bondye ki annan pouvwar ek lotorite lo zot, de pre, osi de lwen.

²⁴ Personn pa kapab zwe avek mwan ki mon pa pou war li. Eski ou pa konnen ki mon partou dan lesyel e lo later? SENYER i deklare.

Bann Profet I Rakont bann Rev Mansonz

²⁵ Mon'n tande sa ki bann profet pe dir. Zot pretann ki zot koz dan mon non. Zot dir: Mon'n ganny en vizyon! Mon'n ganny en vizyon! Me sa pa vre.

²⁶ Sa pa kapab kontinyen pour lontan ankor. Zot pa kapab kontinyen senm sa bann mansonz ki zot fabrike zot menm!

²⁷ Par sa bann rev ki zot rakont kanmarad, zot oule fer mon pep oubliy mon non, parey zot bann zanset ti oubliy mon non pour al ador Baal.

²⁸ Sa profet ki'n ganny en rev, i devre rakont son rev! Sa profet ki'n antann en mesaz ki sorti kot mwan, i devre proklanm sa mesaz avek fidelite! Ki lapay pe fer avek dible? SENYER i deklare.

²⁹ Mon mesaz pa i parey en dife ki bril tou? SENYER i deklare. Pa i parey en marto ki kas ros?

³⁰ Pour sa rezon, SENYER i deklare, mon atak sa bann profet ki pran mon parol avek kanmarad.

³¹ Mon osi kont sa bann profet ki anons zot prop mesaz e pretann ki i sorti kot mwan, SENYER i deklare.

³² Mon pou atak sa bann profet ki rakont bann fo rev avek mon pep e dir ki zot in ganny en mesaz sorti kot mwan, SENYER i deklare. Par zot bann mansonz, zot pe tronp mon pep SENYER i deklare. Zanmen mon'n anvoy zot, zanmen mon'n donn zot okenn lord pour ale. Zot pa kapab rann okenn servis mon pep, SENYER i deklare.

Eski Parol Bondye I En Fardo?

³³ SENYER ti dir mwan: Zeremi! Si mon pep oubyen en profet, oubyen en pret i demann ou: Ki mesaz sorti kot SENYER? Ki responsabilite i pe met lo nou? Ou ava reponn li: Ou menm ki en fardo pour SENYER! I pou rezet ou, SENYER i deklare.

³⁴ Si nenport ki parmi mon pep, oubyen en profet oubyen en pret i koz lo sa fardo ki SENYER in met lo li, mon pou pini li avek son fanmir.

³⁵ O kontrer, zot devre demann zot zanmi ek zot frer: Ki larepons SENYER in donnen? Ki SENYER in dir?

³⁶ Fodre pa ki lepep i koz lo fardo ki SENYER in met lo nou, akoz parol SENYER i zanmen en fardo. Si ou koz konmsa, ou pe detourn Parol Bondye ki vivan, SENYER liniver, nou Bondye.

³⁷ Zeremi! Al demann bann profet: Ki repons SENYER in donnen? Ki SENYER in dir?

³⁸ Si zot kontinyen mansyonn fardo ki SENYER in enpoz lo nou, kan mwan, mon'n defann zot, alor ou ava dir zot:

³⁹ Mon pou debaras mwan avek ou e avek sa lavil ki mon ti donn ou ek ou bann zanset.

⁴⁰ Mon pou kouver ou avek dezoner pour touzour e ou pa pou zanmen retrouv ou loner. Personn pas pou oubliy ou.