Zeremi 21 - Labib An Kreol Seselwa

Senyer I Reponn Lerwa Sedesyas

¹ Zeremi ti resevwar en mesaz sorti kot SENYER, pour li adres Sedesyas. Lerwa ti'n anvoy Pasour, garson Malkiya avek pret Sofoni, garson Maaseya pou demann li:

² Konsilte SENYER pour nou, akoz Naboukodonozor, lerwa Babilonn, pe fer lager kont nou. Kekfwa SENYER ava fer en mirak dan nou faver e fer Naboukodonozor sorti kot nou.

³ Alor Zeremi ti reponn zot:

⁴ Al dir Sedesyas: La sa ki SENYER, Bondye Izrael, i deklare: Ou pe fer lager kont larme lerwa Babilonn ki'n anserkle ou lavil. Mon pou detourn kont ou, tou bann zarm ki ou pe servi kont lerwa Babilonn. Mon pou fors bann gerye ki pe anserkle ou pour retourn dan lavil.

⁵ Mwan menm, mon pou lager kont ou avek tou mon lafors e dan en lakoler terib e vyolan.

⁶ Mon pou detri tou et vivan dan sa lavil: Zonm ek zannimo. Zot pou mor dan en lepidemi terib.

⁷ SENYER ti deklare: Kanta Sedesyas, lerwa Zida ek son bann sef ek tou dimoun ki'n sirviv lafanmin, lepe ek lepidemi, mon pou livre zot dan lanmen lerwa Naboukodonozor ek bann lennmi ki oule touy zot. Naboukodonozor pou masakre zot tou. I pa pou eparny personn, ni montre konpasyon oubyen pitye anver personn.

⁸ Ou ava dir sa pep: La sa ki SENYER i deklare: Mon pou les ou swazir ant semen lavi ek semen lanmor.

⁹ Tou dimoun ki ava reste dan lavil pou ganny masakre oubyen mor par lafanmin, oubyen par lepidemi. Me sa bann parmi zot ki ava sorti e ki ava rann zot avek bann Babilonyen ki pe anserkle lavil, zot pa pou ganny touye. Omwen, zot ava'n kapab sov zot lavi.

¹⁰ Annefe, SENYER i deklare: Mon pe tourn kont lavil Zerizalenm, pa pour son boner, me pour son maler. Mon pou detri li. I pou ganny livre avek lerwa Babilonn ki pou met dife ladan.

Senyer Pou Pini bann Lerwa Zida

¹¹ La en mesaz SENYER pour lafanmir rwayal Zida: Ekoute sa ki SENYER i deklare:

¹² Zot ki sorti dan lafanmir David, la sa ki SENYER i deklare: Pratik vre lazistis tou le bomaten. Delivre bann ki pe ganny kraze anba lanmen bann ki pli for. Sankwa, akoz zot bann move aksyon, mon lakoler pou eklate parey en dife, ki personn pa kapab tennyen.

¹³ Mon kont zot ki reste dan vale, la kot bann ros i plat, SENYER i deklare. Annefe, zot dir: Personn pa pou kapab desann pour atak nou ni penetre dan nou landrwa kasyet.

¹⁴ Mon pou fer ou rann kont, dapre ou bann aksyon, SENYER i deklare. Mon pou met dife avek ou lafore; sa dife pou bril tou sa ki dan zalantour.