Zeremi 2 - Labib An Kreol Seselwa

Bondye I Pran Swen avek Izrael

¹ SENYER ti ordonn avek mwan

² al proklanm sa mesaz avek tou bann zabitan Zerizalenm. La sa ki SENYER i deklare: Mon rapel byen koman zot ti reste fidel anver mwan kan zot ti zenn; koman zot ti kontan mwan kan nou ti'n fek marye. Zot ti swiv mwan dan dezer, dan en pei kot zonm pa senmen.

³ Izrael! Dan sa letan, ou ti zis pour mwan. Ou ti sakre pour mwan, parey premye prodwi mon rekolt. Sa enn ki ti rod zafer avek ou, mon ti fer li soufer; maler ti tonm lo li. SENYER ki deklare.

Pese Zanset Izrael

⁴ Tou bann desandan Zakob! Tou bann tribi Izrael!

⁵ La sa ki SENYER i deklare: Ki zot zanset i annan kont mwan ki'n fer zot kas relasyon avek mwan, pour zot al ador bann zidol initil e rann zot menm initil?

⁶ Zot pa ti dir: Nou bezwen retourn kot SENYER ki'n fer nou sorti Lezip, ki'n gid nou dan dezer, kot i annan presipis, kot nanryen pa pouse. I fernwanr, napa personn ki reste e personn pa pase la.

⁷ Mon'n fer zot antre dan en pei avek plantasyon fri, pour zot manz son bann fri e zouir son bann prodwi. Me kan zot ti vin dan mon pei, zot in fer li vin enpir, Zot in rann mon patrimwann degoutan.

⁸ Bann pret pa ti demande: Oli SENYER? Zot ki konn mon lalwa, zot pa konn mwan. Bann dirizan ti revolte kont mwan. Bann profet ti koz lo non Baal e atas zot avek bann bondye san okenn valer.

Bondye I Met Izrael Ankour

⁹ Pour sa bann rezon, mwan, SENYER, mon deklare: Mon pou kontinyen akiz zot. Mon pou akiz osi zot bann desandan.

¹⁰ Alor, travers lanmer lo kote Was. Ale ziska zil Sip e gete. Anvoy en dimoun kot bann Arab ki reste Kedar. Zot ava dekouver ki zanmen en keksoz parey in arive avan.

¹¹ Zanmen en nasyon in sanz son bondye, menm si i pa bondye. Me mon pep in sanz son loner pour swazir bann bondye ki pa kapab ed li.

¹² Lesyel i boulverse, soke. I tranble, devan sa sityasyon orib, i reste paralize. SENYER ki deklare.

¹³ Wi! Mon pep in komet de pese: In abandonn mwan, sa sours delo fre, pour al fouy bann pwi ki annan trou e pa gard delo.

Konsekans lo Izrael pour Abandonn Senyer

¹⁴ Eski pep Izrael i en lesklav? Eski in ne dan lesklavaz? Akoz alor zot pourswiv li?

¹⁵ Zot kriy avek li parey bann zenn lyon ki fer tande zot lavwa. Zot in detri son pei konpletman. Personn pa reste dan bann lavil brile.

¹⁶ Menm bann zabitan Menmfis ek Tapanes pour vin raz son latet kler.

¹⁷ Izrael! Tousala in ariv ou akoz ou'n abandonn SENYER, ou Bondye ler i ti pe gid ou lo ou semen.

¹⁸ Aprezan, ki ou krwar ou pou gannyen ler ou al Lezip kot ou pou bwar delo larivyer Nil? Ki ou krwar ou pou gannyen ler ou al Asiri kot ou pou bwar delo larivyer Efrat?

¹⁹ Ou prop pese ki pini ou. Ou bann enfidelite pe retourn kont ou. Konmsa, ou ava aprann ki mannyer i fer mal abandonn mwan, SENYER ou Bondye, e pa reste fidel anver mwan, SENYER, Bondye liniver i deklare.

Izrael I Refize Ador Senyer

²⁰ La sa ki SENYER liniver i deklare: Izrael! Depi lontan ou pe revolte kont mwan. Ou'n refize obei mwan, ou'n refize ador mwan. Alor, lo nenport montanny e anba tou pye dibwa avek ver, ou'n donn ou lekor koman prostitye.

²¹ Pourtan, mon ti'n plant ou koman en pye rezen bon kalite, en plant bon kalite e sir. Ki mannyer ou'n dezenere pour vin en pye rezen sovaz ki son bann fri i eg?

²² Menm si ou lav ou avek tou kalite savon tre for, mark ou fot pou kanmenm reste devan mwan, Senyer BONDYE i deklare.

²³ Koman ou kapab oze dir: Mon pa'n fer nanryen ki kapab rann mwan enpir; mon pa'n zanmen ador bann Baal? Gete koman ou'n konport ou dan vale; gete ki ou'n fer. Ou parey en zenn femel samo an sezon ki pe tay taye.

²⁴ Ou parey en femel bourik sovaz ki an saler; i taye dan dezer, son nennen dan divan. Lekel ki kapab kontrol li kan i dan sa leta? Bann mal ki anvi li, pa bezwen fatig zot. Zot pou ganny li pandan son sezon.

²⁵ Izrael! Fer atansyon ou pou fini san sandal e lagorz sek. Me ou dir: I'n tro tar pour mwan sanze; mon kontan bann bondye etranze mon pa kapab aret swiv zot.

Izrael I Merit En Pinisyon

²⁶ Me en zour, zot ki reste Izrael, lerwa ek sef, pret ek profet, zot osi, zot pou kouver ek laont parey en voler ki'n ganny atrape.

²⁷ Zot dir avek en bondye an bwa: Ou menm mon papa! E avek en stati ros: Ou ki'n donn mwan lavi! Olye met ou konfyans dan mwan, ou'n tourn ou ledo avek mwan. Me zour ou pou dan traka, ou pou kriye: Leve! Vin sov mwan.

²⁸ Me oli ou bann bondye ki ou'n fabrike pour ou menm? Izrael! Ou ki annan otan bondye ki i annan lavil dan Zida, kan ou dan maler, dir zot vin sov ou si zot kapab.

²⁹ Ou napa drwa pour fer mwan okenn repros, akoz ou ki'n revolte kont mwan, SENYER ki deklare.

³⁰ Mon'n esey koriz ou bann zanfan; me sa pa'n servi dan nanryen. Parey en lyon anraze, ou'n masakre bann profet ki mon ti'n anvoy ou.

³¹ Dimoun ki dan sa zenerasyon! Ekout byen parol SENYER! Eski mon'n vin parey en dezer pour ou oubyen en pei kot tou i fernwanr? Mon pep! Akoz ou dir: Nou lib, nou pa pou zanmen retourn kot ou?

³² Eski en zenn fiy i kapab oubliy son bann bizou? Eski en nouvel marye i kapab oubliy son rob maryaz? Alor! Akoz mon pep in oubliy mwan depi tou sa bann letan?

³³ Ou konnen koman fer pour ou ganny en kantite lanmoure. Ou'n menm montre sa bann fanm ou bann vis.

³⁴ Menm ou lenz in ganny tase avek disan bann pov inosan. Ou byen konnen ki sa pa disan dimoun ki ou'n atrape pe kas ou lakaz.

³⁵ Ou pretann ki ou inosan, e ki mon pa devre pini ou. Akoz ou deklare ki ou pa'n fer nanryen mal, mon pou met ou ankour.

³⁶ Ou'n fasilman sanz ou semen, pour ou al kot bann bondye lezot nasyon. Bann Asiriyen in fer ou onte; bann Ezipsyen pou fer parey.

³⁷ Lezip osi, ou pou kit li dan laont, avek ou de lanmen lo latet. Mwan, SENYER, mon'n rezet sa bann dan ki ou ti'n met ou konfyans. Ou pa pou ganny nanryen avek zot.