Zeremi 19 - Labib An Kreol Seselwa

Gargoulet Kase

¹ La sa ki SENYER ti dir: Al aste en gargoulet kot en potye. Pran avek ou detrwa zonm parmi bann ansyen e detrwa pret pli aze.

² Sorti e al dan kote vale Ben Hinonm ki dan lantre laport bann Po kase. La, ou ava kriy mesaz ki mon pou donn ou.

³ Ou ava dir zot: Lerwa Zida, e zabitan Zerizalenm! Ekout parol SENYER. La sa ki SENYER liniver, Bondye Izrael i deklare: Gete! Mon pou anvoy en tel dezas lo sa later, ki tou dimoun ki ava antann sa ki'n arive pou tranble ek lafreyer.

⁴ Annefe, bann zabitan Zida in abandonn mwan. Mon pa rekonnet sa landrwa ki zot in profannen avek zot bann sakrifis an loner bann fo bondye, bann fo bondye ki ni zot, ni zot zanset, ni bann lerwa Zida pa'n zanmen konnen. Zot in ranpli sa plas avek disan dimoun inosan.

⁵ An loner Baal, zot in konstri en lotel kot zot bril zot zanfan an sakrifis. Sa i en keksoz ki mon pa'n zanmen ordonn zot pou fer, e ki'n zanmen vin dan mon lespri pour demann zot fer.

⁶ Akoz zot in fer tousala, letan pe vini kan sa plas pou nepli ganny apele Tofet oubyen Vale Ben Hinonm, me Vale Masak.

⁷ Mon pou detri tou bann plan ki zabitan Zida ek Zerizalenm i annan pour sa landrwa. Mon pou les zot lennmi masakre zot. Mon pou donn zwazo ek zannimo sovaz zot kadav pou manze.

⁸ Mon pou met sa lavil dan en tel leta degoutan, ki tou dimoun ki pase pou ganny en sok e zot ava kriye ek sezisman devan en tel destriksyon.

⁹ Lennmi pou kanp otour lavil e zot pou esey atak son bann zabitan. Mon pou fer zot manz laser zot zanfan e zot pou manz kanmarad.

¹⁰ Apre sa, ou ava kas sa gargoulet devan bann zonm ki'n vin avek ou.

¹¹ Ou ava dir zot: La sa ki SENYER liniver i deklare: Mon pou kas sa pep ek sa lavil parey ou kas en gargoulet ki pa pou zanmen kapab ganny repare. Dimoun pou anter zot kadav menm dan Tofet, akoz pa pou annan okenn landrwa pour anter zot.

¹² Mon promet ki mon pou fer sa lavil ek son bann zabitan vin parey Tofet, SENYER i deklare.

¹³ Tou bann lakaz dan Zerizalenm, menm pale lerwa Zida ek tou bann lakaz kot zot in bril lansan an loner bann zetwal dan lesyel, kot zot in prezant lofrann diven avek sa bann bondye etranze, pou ganny deklare enpir parey Tofet.

¹⁴ Apre sa, Zeremi ti kit Tofet kot SENYER ti'n anvoy li pour koz lo son non. I ti al debout dan lakour tanp SENYER kot i ti dir avek lepep.

¹⁵ La sa ki SENYER liniver, Bondye Izrael i deklare: Mon pe fer vin lo sa lavil e lo bann vilaz zalantour tou sa bann maler ki mon ti'n anonse kont li, akoz bann zabitan i antete e zot in refize ekout mon parol.