Zeremi 14 - Labib An Kreol Seselwa

Pei I Konn Lasesres

¹ La sa ki SENYER ti dir Zeremi lo size lasesres:

² Zida i an dey; son bann lavil pe tonm anrin. Son bann zabitan pe asiz ater. Zerizalenm pe kriy ver lesyel.

³ Bann sef in anvoy bann serviter rod delo; zot al kot bann sitern, me zot pa trouv delo. Zot retourn avek zot potao vid. Dekouraze, kanmi, zot kasyet zot ti kouver zot latet.

⁴ Lapli pa'n tonbe, later i sek. Bann fermye i dezapwente; zot bes latet.

⁵ Menm en manman serf i abandonn son piti ki'n fek ne, akoz nepli annan zerb.

⁶ Bann bourik sovaz i reste dan montanny. Zot pran lapis dan divan parey bann sakal. Zot lizye i fatige afors rod zerb. Me nepli annan.

⁷ Mon pep i kriy ver mwan: Menm si nou pese i akiz nou, ed nou, SENYER, pour loner ou non. Plizyer fwa nou'n tourn nou ledo kont ou; nou'n komet bokou pese kont ou.

⁸ SENYER! Ou ki lespwar Izrael, ou ki son sover dan maler, akoz ou pas parey en etranze dan pei? Akoz ou konport ou parey en vwayazer ki pas zis en lannwit?

⁹ Akoz ou fer sanblan ki ou'n perdi ou lafors, parey en ero ki nepli kapab sov personn? Pourtan, SENYER, ou la parmi nou; ou non in ganny envoke lo nou. Pa les nou tonbe.

Bondye pa Egzos Lapriyer Zeremi

¹⁰ La sa ki SENYER i deklar avek sa pep: Wi, sa pep i kontan marsaye e al kot i anvi. Me sa pa fer plezir SENYER. Mon pa pou oubliy pese ki i'n fer. Mon pou pini li pour sa.

¹¹ SENYER ti dir mwan, “Pa demann mwan fer nanryen pour ed sa pep.

¹² Menm si zot fer en zenn, mon pa pou ekout zot lapriyer; menm si zot ofer mwan bann sakrifis konplet ek lofrann vezetal, mon pa pou aksepte. O kontrer, mon pou detri zot par lager, lafanmin ek lepidemi.”

¹³ Alor mon ti dir, “Malerezman, Senyer BONDYE, bann profet pe dir avek lepep ki pou napa okenn lager ni lafanmin. Dapre zot, ou'n promet ki pou annan en vre lape.”

¹⁴ SENYER ti reponn mwan, “Bann profet pe servi mon non pour koz mansonz. Mon pa'n anvoy zot koz dan mon non; mon pa'n donn zot okenn lord; mon pa'n koz okenn parol avek zot. Bann vizyon ki zot dir zot in ganny pa sorti kot mwan. Tou zot bann fo mesaz i sorti dan zot limazinasyon e pa fer okenn sans.”

¹⁵ Pour sa rezon, la sa ki SENYER i deklare: Konsernan bann profet ki mon pa'n anvoye, me ki pe koz an mon non e ki dir ki pou napa ni lager ni lafanmin, mon pou detri zot par lager e par lafanmin.

¹⁶ Sa bann dimoun avek ki zot in anons lavenir, zot osi, zot pou mor dan menm fason. Zot lekor pou ganny zete dan bann lari Zerizalenm, e pa pou annan personn pour anter zot. Sa pou ariv avek zot tou: Fanm, garson ek fiy. Mon pou fer zot mesanste retonm lo zot menm.

Zeremi I Avoue Fot son Pep

¹⁷ La sa ki ou ava dir lepep: Mon lizye i ranpli avek larm nwit e zour; mon pa aret plere, akoz mon pep ki mon kontan parey mon fiy in soufer en kantite. Son blesir i vreman grav.

¹⁸ Kan mon al dan lakanpanny, mon war zis kadav dimoun ki'n ganny masakre. Kan mon retourn dan lavil, mon war dimoun ki pe mor lafen. Profet avek pret i vwayaz atraver pei; me zot pa konpran nanryen.

Lepep I Plede pour Delivrans

¹⁹ Lepep i demann SENYER: SENYER! Eski ou'n vreman rezet Zida? Eski ou'n degoute avek Zerizalenm? Akoz ou'n tap nou sitan for ki nou blesir pa geri? Nou ti annan lespwar, me nanryen bon pa'n ariv nou; nou ti esper gerizon, me lafreyer ki'n anvai nou.

²⁰ SENYER! Nou konnen e nou rekonnet ki nou ek nou bann zanset, nou'n mal azir kont ou.

²¹ Akoz ou promes, pa mepriz nou. Pa anmenn dezoner lo Zerizalenm, la kot tronn ou laglwar i'n ganny etabli. Pa kas sa lalyans ki ou ti fer avek nou.

²² Napa enn sa bann fo bondye dan lezot nasyon ki kapab fer lapli tonbe. Lesyel li tousel pa kapab fer lapli tonbe. SENYER nou Bondye, zis dan ou, ki nou'n met nou lespwar. Ou ki'n fer tousala arive.