Zeremi 12 - Labib An Kreol Seselwa

Zeremi I Kestyonn Bondye

¹ SENYER! Ou tro zis pour mwan akiz ou. Malgre sa, mon oule koz lo lazistis avek ou. Akoz malfeter i prospere dan lavi? Akoz bann malfeter i viv trankilman?

² Ou'n plant zot e zot in pran rasin; zot grandi e zot prodwi bann fri. Zot touzour pe dir dibyen lo ou. Selman, zot leker i lwen avek ou.

³ Me ou, SENYER, ou konn mwan, ou war mwan; ou konnen koman mon kontan ou. Rezerv zot parey mouton pour labatwar, gard zot ziska zour zot ava ganny touye.

⁴ Later i sek, zerb in fletri. Zannimo ek zwazo pe mor. Tousala, akoz mesanste sa bann dimoun ki'n dir: Bondye pa war sa ki nou pe fer.

⁵ La sa ki SENYER ti deklare: Zeremi! Si ou fatige fer lakours avek en zonm, ki mannyer ou pou kapab fer lakours avek en seval? Si ou pa santi ou an sekirite dan en pei trankil, ki ou pou fer si ou dan bann gran zerb obor larivyer Zourden?

⁶ Annefe, menm bann manm ou prop fanmir in trai ou. Zot in fer konplo kont ou. Pa fer zot konfyans, menm ler zot vin anmyel ou avek bann zoli parol.

Senyer I Tris akoz Pese Son Pep

⁷ La sa ki SENYER i deklare: Mon'n abandonn Izrael; Mon'n rezet mon nasyon prefere. Mon'n livre sa pep ki mon kontan dan lanmen son bann lennmi.

⁸ Mon prop pep ki mon'n swazir in vir kont mwan. Parey en lyon dan lafore, in kriy avek mwan. Sa i fer mwan deteste li.

⁹ Sa pep ki mon'n swazir, i parey en zwazo ki pe ganny atake par tou kote. Rasanble tou bann zannimo sovaz! Dir zot vin pran par dan festen!

¹⁰ Bann berze avek zot troupo in detri mon plantasyon rezen. Zot in pil lo mon later; zot in transform mon zoli plantasyon e fer li vin en dezer ranpli avek latristes.

¹¹ Zot in fer li vin en rezyon devaste ki'n ganny marke par dey. Pei antye in ganny detri e personn pa pran okenn ka.

¹² Partou dan rezyon montanny kot personn pa reste, bann devastater pe vini. Mon'n anvoy lager pour detri pei antye. Pou napa lape.

¹³ Mon pep in senm lagrenn dible, me zot in rekolte move zerb. Zot in travay dir, san okenn profi. Zot rekolt pa'n bon akoz gran lakoler SENYER.

¹⁴ La sa ki SENYER i deklare: Tou mon bann move vwazen ki'n rin sa pei ki mon'n donn mon pep Izrael, mon pou derasin zot dan zot pei, parey ou derasin en plant. Mon pou osi derasin parmi zot, bann zabitan Zida.

¹⁵ Me apre ki mon'n derasin zot, mon pou pran pitye ankor pour zot tou. Mon pou retourn avek zot dan zot pei, sakenn dan son teritwar.

¹⁶ Si zot senserman aksepte pour viv parey mon pep, si zot pret serman lo non SENYER ki vivan parey zot ti ansenny mon pep fer an loner Baal, alor zot osi, zot ava fer parti mon pep.

¹⁷ Me si zot pa oule obei mwan, alor mon pou derasin zot definitivman e detri zot totalman, SENYER i deklare.