Zenez 9 - Labib An Kreol Seselwa

Lalyans Bondye avek Noe

¹ Bondye ti beni Noe ek son bann garson. I ti dir zot: Fer bokou zanfan, ogmant ou fanmir e ranpli later.

² Tou bann zannimo lo later, tou zwazo dan lesyel, tou bann pti bebet ki bouze lo later ek tou pwason dan lanmer pou per ou e soumet devan ou.

³ Mon pou donn zot koman nouritir tou sa ki bouze lo later ek tou sa ki vivan, parey mon ti'n donn zot bann plant; mon donn zot tousala pour manze.

⁴ Me fo-dre pa ki zot manz lavyann avek son lavi, setadir, son disan.

⁵ Mon pou demann kont zot disan, ki zot lavi; mon pou demann kont en zannimo ki touy en et imen. Sak et imen ki pran lavi son sanblab devre rann kont.

⁶ Sa enn ki fer koule disan en et imen, li osi en et imen pou fer koule son disan, akoz zonm ti ganny fer dan limaz Bondye.

⁷ Kanta zot, zot ava fer bokou zanfan, ogmant popilasyon e ranpli later.

⁸ Bondye ti osi dir Noe ek son bann garson,

⁹ “Mon etabli mon lalyans avek zot e avek zot desandans;

¹⁰ osi avek tou kreatir vivan ki avek ou: Zwazo, zannimo domestik, zannimo sovaz, tou bann ki'n sorti dan lars avek ou; tou zannimo lo later.

¹¹ Mon etabli mon lalyans avek zot: Zanmen ankor mon pou detri bann et vivan par delo en deliz; pa pou zanmen annan ankor en deliz pour detri later.”

¹² Bondye ti azoute, “La siny sa lalyans ki mon fer ant mwan ek zot, ensi ki tou bann et vivan ki avek ou pour tou zenerasyon pour touzour:

¹³ Mon pou plas mon larkansyel e i ava servi koman en siny lalyans ant mwan ek later.

¹⁴ Sak fwa ki mon rasanble bann nyaz par lao later, en larkansyel pou aparet dan nyaz.

¹⁵ Mon pou rapel lalyans ki mon'n fer ant mwan ek zot, e avek tou bann et vivan, ki delo pa pou zanmen vin en deliz pour detri tou bann et vivan lo later ankor.

¹⁶ Kan mon ava war en larkansyel aparet dan nyaz, mon pou rapel lalyans permanan ant Bondye ek tou bann et vivan lo later.”

¹⁷ Bondye ti dir Noe, “Sa i siny lalyans ki mon'n etabli ant mwan ek tou et vivan ki lo later.”

Noe ek Son bann Garson

¹⁸ Bann garson Noe ki ti sorti dan lars, ti Senm, Kanm ek Zafet. Kanm ti papa Kanaan.

¹⁹ Desandans sa trwa garson Noe ti peple later antye.

²⁰ Noe ti premye fermye pour kiltiv en plantasyon rezen.

²¹ I ti bwar diven, i ti sou e i ti tir li touni dan son latant.

²² Kanm, papa Kanaan ti war son papa touni, e i ti al rakont son de frer deor.

²³ Alor, Senm ek Zafet ti pran en lenz ki zot ti met lo zot zepol e mars annaryer e kouver zot papa. Zot pa ti vire pour zot pa war touni zot papa.

²⁴ Kan Noe ti desoule, i ti aprann sa ki son dezyenm garson ti'n fer.

²⁵ Alor, i ti dir: Kanaan ava ganny modi! I ava vin dernyen lesklav son bann frer.

²⁶ I ti osi azoute: Rann glwar SENYER, Bondye Senm! Kanaan ava vin son lesklav.

²⁷ Zafet ava prospere! I ava touzour reste dan latant Senm! Kanaan ava vin lesklav Zafet.

²⁸ Apre deliz, Noe ti viv ankor 350 an.

²⁹ I ti mor laz 950 an.