Zenez 8 - Labib An Kreol Seselwa

Noe I Sorti dan Lars

¹ Bondye ti mazin Noe ek tou bann zannimo sovaz ek zannimo domestik ki ti avek li dan lars. I ti fer en divan soufle lo later e delo ti konmans desann.

² Bann sours delo souteren ti aret koule e bann lafnet dan lesyel ti fermen, lapli ti arete.

³ Delo ti desann gradyelman. Apre 150 zour, delo ti'n diminyen.

⁴ Lo disetyenm zour, setyenm mwan, lars ti swe lo enn bann montanny Ararat.

⁵ Delo ti kontinyen desann ziska dizyenm mwan e lo premye zour dizyenm mwan, bann latet montanny ti aparet.

⁶ Apre 40 zour, Noe ti ouver en lafnet ki i ti'n mete dan lars.

⁷ I ti larg en korbo ki ti ale vini, ziska ki delo ti'n sek lo later.

⁸ Apre, Noe ti larg en pizon pour verifye si delo ti'n sek lo later.

⁹ Me sa pizon pa ti war landrwa pour li apoze, akoz ti ankor annan delo partou lo later. Alor, i ti retourn kot Noe dan lars. Noe ti met son lanmen deor e fer li antre.

¹⁰ Noe ti esper ankor set zour e i ti larg sa pizon ankor en fwa.

¹¹ Aswar, sa pizon ti retournen avek en brans zoliv ver dan son labek. Alor, Noe ti konnen ki delo ti'n desann.

¹² I ti esper ankor set zour pour li larg en lot pizon ki pa ti retournen.

¹³ Lannen ki Noe ti ganny 601 an, lo premye zour premye mwan, delo ti'n fini sek lo later. Noe ti tir kouvertir lo lars e i ti war ki later ti'n sek.

¹⁴ Lo vennsetyenm zour, dezyenm mwan, later ti'n konpletman sek.

¹⁵ Alor, Bondye ti dir Noe,

¹⁶ “Sorti dan lars avek ou fanm, ou bann garson ek fanm ou bann garson.

¹⁷ Fer sorti tou bann diferan lespes zannimo ki avek ou, bann zwazo ek tou bann pti bebet, pour ki zot ava reprodwir partou lo later e ranpli later.”

¹⁸ Alor, Noe ti sorti dan lars avek son bann garson, son fanm ek bann fanm son bann garson.

¹⁹ Tou zannimo, tou zwazo ek pti bebet, ti sorti par group.

Noe I Ofer En Sakrifis

²⁰ Noe ti fer en lotel pour SENYER. I ti pran enn parmi bann zannimo pir ek en zwazo pir e i ti ofer koman en sakrifis konplet lo sa lotel.

²¹ Loder son sakrifis ti fer plezir SENYER ki ti dir dan li menm: Mon pa pou zanmen modi later ankor akoz bann et imen. I vre ki depi son lazenes, leker zonm i move. Zanmen ankor mon pou detri bann vivan parey mon'n fer.

²² Tan ki later i egziste, pou annan en sezon pour plante e enn pour rekolte. Pou annan letan lafreser ek letan lasaler, sezon lete ek sezon liver, lizour ek lannwit. Sa pa pou zanmen arete.