Zenez 6 - Labib An Kreol Seselwa

Mesanste Imen

¹ Kan zonm ti konmans ogmante lo later e zot ti donn nesans bann fiy,

² bann garson bondye ti war ki bann fiy zonm ti atiran. Alor, zot ti swazir zot koman zot fanm.

³ Alor, SENYER ti dir: Mon lespri pa pou reste touzour dan bann et imen, akoz i zis laser. Son lavi pou dire zis 120 an.

⁴ Dan sa lepok, e menm apre, ti annan bann zean lo later. Desandan bann garson bondye avek bann fiy bann imen. Zot ti bann ero e bann dimoun renonmen otrefwa.

⁵ SENYER ti war ki mesanste zonm ti gran lo later e zot lespri ti tourn zis ver lemal.

⁶ SENYER ti regrete ki i ti'n fer bann et imen e met zot lo later; i ti aflize.

⁷ I ti dir: Mon pou detri lo later bann et imen ki mon'n kree. Mon pou detri depi zonm, zannimo, pti bebet ek zwazo dan lesyel. Mon regrete mon'n kree zot.

⁸ Me Noe ti trouv faver devan SENYER.

Bondye I Deside Sov Noe

⁹ La lalis bann desandan Noe. Dan zenerasyon sa lepok, Noe ti en zonm zis e san repros. I ti mars avek Bondye.

¹⁰ I ti ganny trwa garson: Senm, Kanm ek Zafet.

¹¹ Bondye ti konstate ki later ti'n koronpi e ranpli avek vyolans.

¹² Bondye ti war ki later ti'n koronpi.

¹³ Alor, i ti dir Noe, “Mon'n deside met lafen avek tou. Later i ranpli avek vyolans akoz zonm. Mon pou detri zot ansanm avek later.

¹⁴ Ou ava fer en gro bato avek dibwa solid. Fer bann konpartiman ladan e kouver li, anndan deor, avek goudron.

¹⁵ La ki mannyer ou pou fer li: I ava 150 met longer, 25 met larzer e 15 met oter.

¹⁶ Ou ava kouver li avek en twa an tapenak e ou ava kit en lespas en demi met ant twa ek son borde. Ou ava met en laport lo kote. Sa lars ava annan trwa letaz.

¹⁷ Mwan, mon pou anvoy en deliz lo later pour detri tou sa ki annan souf lavi anba lesyel. Tou sa ki lo later pou mor.

¹⁸ Mon pou etabli mon lalyans avek ou; ou ava antre dan lars ou, ou bann garson, ou fanm ek bann fanm ou bann garson.

¹⁹ Ou ava osi fer antre dan lars en per tou zannimo dan sak lespes, en mal ek en femel pour konserv zot vivan avek ou.

²⁰ Ou ava fer antre en per zannimo dan sak lespes: Parmi bann zwazo, gro zannimo, bann pti bebet en per dan sak lespes pou vin kot ou pour gard zot vivan.

²¹ Fer tou provizyon, pour ki ou ek bann zannimo, ava annan dekwa manze.”

²² Noe ti fer tou sa ki Bondye ti'n dir li.