Zenez 48 - Labib An Kreol Seselwa

Zakob I Beni Efraim ek Manase

¹ Apre sa, Zozef ti ganny dir, “Ou papa i malad.” Alor i ti pran son de garson, Manase ek Efraim e al kot son papa, Zakob.

² Zot ti dir Zakob ki son garson, Zozef, in vin war li. Izrael ti ralye son lafors e i ti asiz lo son lili.

³ Zakob ti dir Zozef, “Bondye Toupwisan in aparet avek mwan Louz, dan pei Kanaan e in beni mwan.

⁴ I ti dir mwan: Mon pou fer ou ganny zanfan e vin en gran pep e mon pou donn sa later ou bann desandans koman son posesyon pour touzour.”

⁵ Zakob ti azoute, “Ou de garson ki ti ne Lezip avan ki mon ti ariv kot ou, Efraim ek Manase, pou vin pour mwan, parey Riben ek Simeon.

⁶ Tou zanfan ki ou pou gannyen apre zot, ava vin pour ou e zot ava resevwar atraver non zot frer en par dan patrimwann.

⁷ Kan mon ti sorti Padann-Aranm, Rasel ti mor dan pei Kanaan dan semen, avan nou ti ariv Efrata. Mon ti anter li lo semen Efrata, setadir Betlehenm.”

⁸ Kan Izrael ti war bann garson Zozef, i ti dir, “Lekel sa?”

⁹ Zozef ti reponn son papa, “Zot mon bann garson ki Bondye in donn mwan isi.” I ti dir, “Fer zot apros isi pour mwan beni zot.”

¹⁰ Izrael pa ti war byen kler, akoz lavyeyes. Zozef ti fer zot apros kot li. I ti may zot, e anbras zot.

¹¹ Izrael ti dir Zozef, “Mon pa ti mazinen si mon ti pou war ou ankor, me la Bondye in fer mwan war ou zanfan osi.”

¹² Zozef ti retir zot lo zenou son papa, e i ti prosternen ziska ater.

¹³ Apre, Zozef ti pran Efraim e met li lo kote gos Izrael, e Manase lo kote drwat, akote kanmarad.

¹⁴ Izrael ti met son lanmen drwat lo latet Efraim menm ki ti pli zenn e son lanmen gos lo latet Manase. I ti bezwen krwaz son lebra. Annefe, Manase ti lene garson.

¹⁵ Apre, i ti beni Zozef: Bondye, ki mon papa Abrahanm ek Izaak ti servi, Bondye ki'n mon berze pandan tou sa letan ziska ozordi!

¹⁶ Mon demande ki sa lanz ki'n delivre mwan dan tou mal, i beni sa de garson. Atraver zot, mon non pa pou ganny oubliye, ensi ki non mon zanset Abrahanm ek Izaak; zot ava vin en gran pep lo later.

¹⁷ Kan Zozef ti war ki son papa ti'n met son lanmen drwat lo latet Efraim, i pa ti kontan. I ti pran lanmen son papa pour met lo latet Manase.

¹⁸ Zozef ti dir li, “Pa konmsa papa. La lene garson, met ou lanmen drwat lo son latet.”

¹⁹ Me son papa ti refize. I ti dir, “Mon konnen mon garson. Li osi i pou vin en pep e i pou vin gran. Son pti frer pou vin pli gran ki li e son desandans pou vin en gran nasyon.”

²⁰ Alor, i ti beni zot. I ti dir: Bann Izraelit pou servi ou non kan zot ava donn benediksyon. Zot ava dir: Bondye ava fer zot parey Efraim ek Manase. Alor, i ti met Efraim avan Manase.

²¹ Apre Izrael ti dir Zozef, “Mon pre pour mor. Bondye pou avek ou e i pou fer ou retourn dan pei ou bann zanset.

²² Mon donn ou Sikenm, en par anplis ki ou bann frer, lavil ki mon ti pran avek bann Amorit avek mon lepe ek mon fles.”