Zenez 47 - Labib An Kreol Seselwa

¹ Zozef ti al kot Faraon. I ti dir li, “Mon papa, ek mon bann frer in arive sorti Kanaan avek zot bann troupo, ek tou sa ki zot posede, e zot in etabli zot dan pei Gosenn.”

² I ti pran senk parmi son bann frer e prezant zot avek Faraon.

³ Faraon ti demann bann frer Zozef, “Ki travay zot fer?” Zot ti reponn, “Nou, ou bann serviter, nou bann berze, parey nou bann zanset.”

⁴ Zot ti dir Faraon, “Nou'n vin isi akoz napa zerb pour nou troupo, akoz lafanmin i sever dan Kanaan. Nou sipliy ou, les nou, ou bann serviter reste Gosenn.”

⁵ Faraon ti dir Zozef, “Ou papa ek ou bann frer in vin kot ou.

⁶ Lezip i ou pei. Fer ou papa ek ou bann frer etabli zot dan meyer landrwa. Etabli zot dan Gosenn, e si i annan okenn bann zonm kapab, met zot ansarz mon bann troupo.”

⁷ Zozef ti fer son papa Zakob, monte e prezant li devan Faraon. Zakob ti beni Faraon.

⁸ Faraon ti demann Zakob, “Ki laz ou annan?”

⁹ Zakob ti reponn, “I annan 130 an depi ki mon lo later. Mon bann lannen in kourt e difisil; pa otan ki pour mon bann zanset pandan zot bann long lavi nomad.”

¹⁰ Zakob ti beni Faraon e i ti kit li.

¹¹ Zozef ti enstal son papa ek son bann frer Lezip, dan meyer rezyon Ranmses, parey Faraon ti'n ordonnen.

¹² Zozef ti donn zot manze dapre lakantite dimoun ki zot ti annan pour nouri.

Gran Lafanmin

¹³ Ti nepli annan manze dan pei, akoz lafanmin ti sever. Lezip ek pei Kanaan ti soufer akoz sa lafanmin.

¹⁴ Zozef ti ranmas tou larzan dan Lezip ek Kanaan kont dible ki dimoun ti aste. I ti anmenn sa larzan kot Faraon.

¹⁵ Kan tou larzan ti'n fini dan Lezip e dan Kanaan, bann Ezipsyen ti vin kot Zozef. Zot ti dir li, “Donn nou manze. Akoz ki nou bezwen mor devan ou? Nou larzan in fini.”

¹⁶ Zozef ti reponn, “Si zot nepli annan larzan, donn mwan zot troupo e mon ava donn zot manze.”

¹⁷ Zot ti anmenn zot troupo kot Zozef, e Zozef ti sanz manze kont zot seval, zot troupo bef, mouton, kabri, ek zot bourik. Pandan lannen, Zozef ti donn zot manze kont tou zot troupo.

¹⁸ Zot ti vin kot li lannen apre. Zot ti dir li, “Nou pa kapab kasyet ou ki nou larzan in fini e ki tou nou troupo i pour ou. Nou napa nanryen, eksepte nou later ek nou menm.

¹⁹ Akoz ki nou bezwen mor ansanm avek nou later? Aste nou later ek nou menm, annesanz, ou ava donn nou manze e nou ava vin lesklav Faraon. Donn nou legren e nou ava viv, nou pa ava mor e nou later pa ava reste dan labandon.”

²⁰ Zozef ti aste Lezip antye pour Faraon. Tou bann Ezipsyen ti vann zot later akoz lafanmin ti sever dan pei. Pei antye ti vin propriyete Faraon.

²¹ Tou lepep ti ganny transfere ver bann lavil atraver pei.

²² Zis later bann pret ki pa ti ganny aste, akoz zot ti ganny en pansyon avek Faraon pour zot viv. Alor, zot pa ti bezwen vann zot later.

²³ Zozef ti dir lepep, “La ki mon'n aste zot avek zot later pour Faraon, zot ava ganny legren pour zot senmen e kiltiv later.

²⁴ Lo bann rekolt, zot ava donn Faraon en senkyenm parti e leres ava vin pour zot. Zot ava gannyen pour senmen ek dekwa pour manze, pour zot ek zot fanmir.”

²⁵ Zot ti dir, “Ou'n sov nou lavi. Nou dakor pour vin lesklav Faraon.”

²⁶ Alor Zozef ti fer en lalwa ki ankor egziste ozordi, konmkwa Faraon i resevwar en senkyenm tou rekolt. Zis later bann pret ki Faraon pa ti aste.

Dernyen Ve Zakob

²⁷ Bann Izraelit ti reste dan pei Lezip, dan rezyon Gosenn. Zot ti aste propriyete e zot ti ganny bokou zanfan.

²⁸ Zakob ti reste Lezip pandan 17 an. An tou, i ti viv 147 an.

²⁹ Kan lanmor ti aprose, Zakob ti apel son garson Zozef. I ti dir li, “Si vreman ou kontan mwan, met ou lanmen anba mon kwis e promet mwan ki ou pa pou anter mwan dan Lezip. Mon sipliy ou, promet mwan

³⁰ ki kan mon mor, ou pou anter mwan avek mon bann zanset. Anmenn mon lekor an deor Lezip e anter mwan dan tonbo mon bann zanset.” Zozef ti reponn, “Mon pou fer parey ou'n dir.”

³¹ Zakob ti dir li, “Promet mwan par en serman.” Zozef ti fer en serman. Izrael ti prosternen lo son lili.