Zenez 46 - Labib An Kreol Seselwa

Zakob I Desann Lezip avek Son Fanmir

¹ Alor, Izrael ti konmans son vwayaz avek tou sa ki i ti posede. Ler i ti ariv Berseba, i ti ofer en sakrifis an loner Bondye son papa, Izaak.

² Aswar, Bondye ti koz avek Izrael atraver bann rev. I ti dir li, “Zakob, Zakob.” I ti reponn, “La mon la.”

³ Bondye ti dir li, “Mwan menm Bondye, Bondye ou papa. Pa per pour desann Lezip, akoz mon pou fer ou vin en gran nasyon laba.

⁴ Mwan ki pou al avek ou Lezip, e mon pou retourn avek ou. Se Zozef ki pou ferm ou lizye avek son prop lanmen.”

⁵ Zakob ti kit Berseba. Bann garson Izrael ti anmenn zot papa, Zakob, zot zanfan ek zot fanm dan bann kales ki Faraon ti'n anvoye pour anmenn zot.

⁶ Zot ti pran zot troupo ek zot bann byen ki zot ti'n gannyen dan pei Kanaan. Zakob ti desann Lezip avek tou son desandans.

⁷ I ti pran son bann garson ek son bann pti zanfan, son bann fiy ek zot bann fiy. I ti anmenn tou son desandans avek li Lezip.

⁸ La non bann desandan Izrael, ki ti desann Lezip: Zakob ek son bann garson: Riben, premye garson Zakob.

⁹ Bann garson Riben: Henok, Palou, Hesronn, e Karmi.

¹⁰ Bann garson Simeon: Yemouel, Yamin, Ohad, Yakin, Soar, ek Saoul, garson en fanm Kananeen.

¹¹ Bann garson Levi: Gersonn, Keat, ek Merari.

¹² Bann garson Zida: Er, Onann, Sela, Peres, ek Zera. Er ek Onann ti mor dan pei Kanaan. Bann garson Peres ti Hesronn ek Hamoul.

¹³ Bann garson Isakar: Tola, Poua, Yob, e Simronn.

¹⁴ Bann garson Zabilon: Sered, Elonn ek Yaleel.

¹⁵ Sa i bann garson ki Lea ti fer avek Zakob dan Padann-Aranm. I ti osi annan en fiy, Dina. An tou, ti annan 33 garson ek fiy.

¹⁶ Bann garson Gad: Sifionn, Hagi, Souni, Esbonn, Eri, Arodi, e Areli.

¹⁷ Bann garson Aser: Imna, Yisva, Yisvi, Beria, ek Sera zot ser. Bann garson Beria: Heber e Malkiel.

¹⁸ Sa i bann garson Zilpa, ki Laban ti'n donn koman servant, Lea son fiy; sa i bann zanfan ki i ti fer avek Zakob, 16 an tou.

¹⁹ Bann garson Rasel, fanm Zakob: Zozef ek Benzamen.

²⁰ Dan pei Lezip, Zozef ti ganny Manase ek Efraim, ki Asnat, fiy Poti-Fera pret On ti gannyen.

²¹ Bann garson Benzamen: Bela, Beker, Asbel, Gera, Naaman, Ei, Ros, Moupim, Houpim ek Ard

²² Sa i bann garson Rasel, ki i ti gannyen pour Zakob: An tou 14.

²³ Garson Dan: Housim.

²⁴ Bann garson Neftali: Yatseel, Gouni, Yetzer, ek Silenm.

²⁵ Sa i bann garson Bila, ki Laban ti donn Rasel son fiy, ki i ti fer avek Zakob. Set an tou.

²⁶ Tou sa bann zanfan Zakob ki ti al Lezip, ki ti son desandans, san kont fanm bann garson Zakob: 66 zot an tou.

²⁷ Bann garson Zozef, ki ti ne Lezip: Ti annan de. Bann manm lafanmin Zakob ki ti vin Lezip: 70 an tou.

Zozef I Retrouv Son Papa

²⁸ Zakob ti anvoy Zida kot Zozef devan li pour prepar son vwayaz pour Gosenn. Ler zot ti ariv Gosenn,

²⁹ Zozef ti prepar son kales e mont Gosenn pour al rankontre son papa Izrael. De ki zot ti zwenn, i ti may li e plere pour en bon pe letan.

³⁰ Izrael ti dir Zozef, “La aprezan ki mon'n war ou figir, mon kapab mor, akoz mon konnen ki ou ankor vivan.”

³¹ Zozef ti dir son bann frer e lezot manm son fanmir, “Mon pou al fer konnen Faraon, ki mon bann frer ek mon fanmir ki ti dan Kanaan, in vin kot mwan.

³² Mon pou dir li ki sa bann zonm i bann berze e zot gard bann troupo. Zot in anmenn zot troupo ek tou sa ki zot posede.

³³ Ler Faraon ava apel zot e demann zot, ki travay zot fer,

³⁴ zot ava dir li: Ou bann serviter in gardyen zannimo depi nou lazenes, parey nou bann zanset. Konmsa, i ava les zot reste Gosenn akoz bann Ezipsyen pa ti kontan bann berze.”