Zenez 41 - Labib An Kreol Seselwa

Zozef I Enterpret Rev Faraon

¹ Anviron 2 an plitar, Faraon ti ganny en rev. I ti pe debout obor larivyer Nil,

² kan i ti war set zoli bef byen gra, sorti dan Nil e konmans manz zerb.

³ Apre, set lot bef vilenn e meg, ti sorti dan larivyer Nil, e mont deryer lezot bef.

⁴ Sa set vilen bef meg ti devor sa set zoli bef gra. Alor, Faraon ti sote dan son sonmey.

⁵ I ti redormi e i ti ganny ankor en rev. I ti war set zepi dible, byen gro e byen plen ki ti pe monte lo en menm tiz.

⁶ Apre, i ti war set zepi dible byen meg e tou brile par divan Les.

⁷ Bann zepi meg ti anval sa set zepi gro e plen. Faraon ti reveye; i ti'n zis ganny en rev.

⁸ Bomaten, son lespri ti trouble. I ti fer apel tou bann pret, bann mazisyen ek tou bann savan dan Lezip. Faraon ti rakont zot son rev, me ti napa personn ki ti kapab enterprete.

⁹ Alor, responsab labwason lerwa ti dir Faraon, “Ozordi ki mon mazinen ki mon'n fer en fot.

¹⁰ Kan Faraon ti ankoler avek nou, son bann serviter, e met mwan avek sef patisye dan prizon, dan lakaz sef gard,

¹¹ nou tou le de, nou ti ganny en rev menm swar e sak rev ti annan son sinifikasyon spesyal.

¹² Ti annan en zenn Ebre, serviter komandan bann gard ki ti la avek nou. Nou ti rakont li nou rev e i ti enterpret zot pour nou.

¹³ Tou ti ariv egzakteman parey lenterpretasyon ki i ti'n dir nou. Mon ti reganny mon travay, e lot ti ganny pann.”

¹⁴ Faraon ti donn lord anmenn Zozef. Zot ti tir li toudswit dan prizon. I ti raze, sanz son lenz e zot ti anmenn li devan Faraon.

¹⁵ Faraon ti dir Zozef, “Mon'n ganny en rev, e napa personn pour enterpret mon rev. Mon'n antann dir ki ou kapab enterpret rev.”

¹⁶ Zozef ti reponn Faraon, “Pa mwan, me Bondye ki ava donn ou en lenterpretasyon favorab ou rev.”

¹⁷ Faraon ti dir Zozef, “Dan mon rev, mon ti pe debout obor larivyer Nil.

¹⁸ Mon ti war set zoli bef byen gra ki ti monte sorti dan larivyer Nil e zot ti pe konmans manz zerb obor larivyer.

¹⁹ Apre, deryer zot, ti mont set lot bef vilenn e meg.

²⁰ Sa set bef vilenn e meg ti devor sa set zoli bef gra.

²¹ Me kan sa bann zoli bef gra ti'n ganny anvale, san ki ou remarke, sa bann vilen bef ti reste meg, parey avan. Apre, mon ti sote dan mon rev.

²² Mon ti ganny en lot rev: Mon ti osi war set gro zepi dible pe monte lo en sel tiz.

²³ Apre, set lot zepi meg e brile par divan Les ti mont deryer zot.

²⁴ Bann zepi meg ti anval sa set zepi ki ti gro e plen. Mon'n rakont mon bann mazisyen, me personn pa'n kapab donn mwan leksplikasyon.”

²⁵ Zozef ti dir Faraon, “Sa de rev i en sel rev. Bondye in montre Faraon sa ki i pou fer.

²⁶ Sa set zoli bef, i reprezant set lannen, e sa set gro zepi osi, i set lannen. I form en menm rev.

²⁷ Sa set bef meg ki'n mont par deryer sa bann premye, i reprezant set lannen, e sa set zepi meg e brile par divan Les, se set lannen lafanmin.

²⁸ Parey mon'n dir Faraon, Bondye in montre li sa ki i pou fer.

²⁹ Pou annan set lannen labondans partou dan pei Lezip.

³⁰ Me apre, pou annan set lannen lafanmin. Tou sa labondans pou ganny oubliye. Sa lafanmin pou detri pei.

³¹ Sa labondans pou ganny oubliye, akoz sa lafanmin ki pou vin apre, pou terib.

³² Si ou'n rev de fwa, sa i montre ki Bondye in deside e i pa pou tarde pour fer li arive.

³³ Aprezan, fodre ki Faraon i trouv en zonm avek disernman e saz pour met li ansarz Lezip.

³⁴ Fodre ki Faraon i swazir bann sef pour met ansarz pei e fer pey en taks, en senkyenm lo tou prodwi Lezip pandan sa set lannen labondans.

³⁵ Zot ava rasanble tou prodwi, pandan sa bann bon lannen ki pe vini, e anba lotorite Faraon, zot ava met an rezerv sa bann legren dan bann lavil.

³⁶ Sa bann prodwi ava servi koman rezerv pour sa set lannen lafanmin ki Lezip pou pas atraver, pour ki pei pa ganny detri par sa dezas.”

Zozef I Vin Gouverner Lezip

³⁷ Sa propozisyon ti fer plezir Faraon ek son lantouraz.

³⁸ Faraon ti dir zot, “Eski nou kapab trouv en zonm parey sa enn ki ranpli avek lespri Bondye?”

³⁹ Faraon ti dir Zozef, “Aprezan ki Bondye in fer ou konn tousala, napa personn ki osi entelizan e osi saz ki ou.

⁴⁰ Mon pou met ou ansarz mon pei. Tou mon pep pou soumet anba ou lord. Zis mwan ki pou par lao ou, akoz mon lerwa.”

⁴¹ Faraon ti dir Zozef, “La mon met ou ansarz Lezip antye.”

⁴² Apre, Faraon ti tir son bag dan son ledwa e met dan ledwa Zozef. I ti met li zoli lenz linenn ek en kolye annor dan son likou.

⁴³ I ti fer li mont dan kales son asistan e zot ti kriye devan li, “Atansyon! Gouverner pe pase!” Alor, Zozef ti ganny nonmen gouverner Lezip.

⁴⁴ Faraon ti dir Zozef, “Mwan menm Faraon. Dan Lezip, personn pa pou bouz en ledwa, ni en lipye, san ou lotorizasyon.”

⁴⁵ Faraon ti apel Zozef, Safnat-Panea e i ti donn li Asnat, fiy Poti-Fera, pret On, koman son fanm. Alor, Zozef ti al enspekte Lezip antye.

⁴⁶ Zozef ti annan 30 an kan i ti antre dan servis Faraon, lerwa Lezip. I ti enspekte Lezip antye.

⁴⁷ Pandan sa set lannen labondans, pei ti prodwir bann gran rekolt.

⁴⁸ Zozef ti rasanble tou bann prodwi pandan sa 7 an. I ti met an rezerv dan bann lavil, tou manze ki ti ganny prodwi dan lakanpanny.

⁴⁹ I ti met an rezerv dible annabondans, parey disab lo bor lanmer. Ti annan telman ki ti enposib konte.

⁵⁰ Avan premye lannen lafanmin ti arive, Zozef ti ganny de garson avek Asnat, fiy Poti-Fera, pret On.

⁵¹ Zozef ti apel son premye garson Manase. I ti dir: Bondye in fer mwan oubliy tou mon soufrans ek separasyon avek mon fanmir.

⁵² I ti apel son dezyenm garson, Efraim. I ti dir: Bondye in fer mwan ganny zanfan dan pei mon soufrans.

⁵³ Sa set lannen labondans Lezip ti terminen,

⁵⁴ e sa set lannen lafanmin ti arive parey Zozef ti'n dir. Ti annan lafanmin dan tou pei, me dan Lezip, ti annan manze an rezerv.

⁵⁵ Kan manze ti fini e bann Ezipsyen ti santi lafen, zot ti kriy ver Faraon pour demann dipen. Faraon ti dir zot, “Al kot Zozef e fer sa ki i dir zot.”

⁵⁶ Lafanmin ti fer ravaz dan pei antye, Zozef ti ouver bann magazen rezerv e i ti vann bann Ezipsyen manze, akoz lafanmin ti vreman sever dan Lezip.

⁵⁷ Dimoun sorti dan tou bann pei, ti vin Lezip kot Zozef pour aste dible, akoz lafanmin ti sever partou lo later.