Zenez 4 - Labib An Kreol Seselwa

Kaen ek Abel

¹ Adan ti ganny relasyon avek Ev. Ev ti ansent e i ti ganny Kaen. I ti dir, “Mon'n fer en zonm avek led SENYER.”

² Ev ti ganny en lot garson, son frer Abel. Abel ti en berze e Kaen ti en fermye.

³ Apre en serten letan, Kaen ti ofer SENYER en lofrann fri ki later ti'n prodwir.

⁴ Abel li, ti ofer en sakrifis bann premye zannimo ki son troupo ti'n prodwir. SENYER ti aksepte Abel ek son lofrann.

⁵ Me i pa ti aksepte Kaen ek son lofrann. Alor, Kaen ti tre ankoler e i ti boude.

⁶ SENYER ti dir li, “Akoz ou ankoler e ou annan en lanmin lo ou figir?

⁷ Si ou fer sa ki byen, ou ava refer, si ou pa fer sa ki byen, pese pou dormi devan ou laport. Me ou, fodre ou kontrol li.”

⁸ En zour, Kaen ti dir son frer Abel, “Annou al pronmnen.” Kan zot ti deor, Kaen ti sot lo son frer Abel e touy li.

⁹ SENYER ti demann Kaen, “Oli ou frer Abel?” Kaen ti reponn, “Mon pa konnen. Eski mwan mon gardyen mon frer?”

¹⁰ SENYER ti dir, “Ki ou'n fer? Disan ou frer pe kriy ver mwan depi later.

¹¹ Dezormen, ou anba malediksyon, ou pou ganny sase lo later ki'n ouver labous pour resevwar disan ou frer ki ou'n touye avek ou lanmen.

¹² Akoz sa, ou pou kiltiv later, me i pa pou prodwir nanryen. Ou pou vin eran e vagabon lo later.”

¹³ Kaen ti dir SENYER, “Mon pinisyon i tro lour pour mwan.

¹⁴ Ou sas mwan dan sa landrwa, lwen avek ou prezans. Mon pou vin en vagabon. Sa ki zwenn mwan pou touy mwan.”

¹⁵ SENYER ti dir li, “Non. Si en dimoun i touy Kaen, vanzans pou set fwa.” SENYER ti met en mark lo Kaen, pour ki personn ki zwenn li pa touy li.

¹⁶ Alor, Kaen ti sorti dan prezans SENYER. I ti al reste Nod, dan kote Les avek Edenn.

Desandans Kaen

¹⁷ Kaen ti ganny relasyon avek son fanm ki ti vin ansent, e ti donn nesans Henok. Kaen ti konstri en lavil ki i ti apel Henok, menm non avek son garson.

¹⁸ Henok ti papa Irad e Irad ti papa Mehouyael. Mehouyael ti papa Metousael, ki ti papa Lemek.

¹⁹ Lemek ti annan de fanm. Enn ti apel Ada e lot Sila.

²⁰ Ada ti donn nesans Yabal, zanset bann dimoun ki ti viv anba latant e sonny zannimo.

²¹ Son frer ti apel Youbal ki ti zanset bann zwer laarp ek laflit.

²² Sila osi ti annan en garson, Toubal-Kaen, en forzron ki ti fer bann zouti an bronz e an fer. Toubal-Kaen ti annan en ser ki ti apel Naama.

²³ Lemek ti dir avek son bann fanm: Ada ek Sila ekout mwan. Zot bann fanm Lemek ekout byen sa ki mon dir: Mon'n touy en zonm pour blesir ki mon'n gannyen, e en zanfan, pour bate ki mon'n resevwar.

²⁴ Si lanmor Kaen i ganny vanze set fwa lanmor Lemek ava ganny vanze 77 fwa.

²⁵ Adan ek son fanm ti ganny ankor en garson ki ti apel Set. Ev ti dir, “Bondye in donn mwan en lot garson pour ranplas Abel ki Kaen ti touye.”

²⁶ Set ti ganny en garson ki i ti apel Enos. Depi sa moman, dimoun ti konmans envok non SENYER.