Zenez 39 - Labib An Kreol Seselwa

Zozef ek Fanm Potifar

¹ Zozef ti ganny anmennen Lezip. Potifar, en sef Ezipsyen, sef bann gard dan lakour Faraon, ti aste li avek bann Ismaelit ki ti'n anmenn li.

² SENYER ti avek Zozef. I ti reisi dan tou sa ki i ti antreprann. I ti travay dan lakaz son met Ezipsyen.

³ Son met ti war ki SENYER ti avek li, e ki SENYER ti fer li reisi dan tou sa ki i ti antreprann.

⁴ Potifar ti bon anver Zozef. I ti pran li dan son servis e anmenn li dan son lakaz. I ti met li ansarz son lakour ek tou sa ki i ti posede.

⁵ Kan Zozef ti ansarz tou keksoz dan lakaz Potifar, SENYER ti beni lakour sa Ezipsyen akoz Zozef. Benediksyon SENYER ti lo tou sa ki i ti posede, dan son lakaz koman dan son plantasyon.

⁶ I ti konfye tou son byen dan lanmen Zozef; i ti nepli okip nanryen, eksepte son manze. Zozef ti en zoli garson.

⁷ Apre en serten letan, fanm Potifar ti konmans zet en regar lo Zozef. I ti dir li, “Vin dormi avek mwan.”

⁸ Me i ti refize e i ti dir fanm son met, “Mon met pa okip nanryen dan lakaz e in konfye mwan tou sa ki i posede.

⁹ Dan sa lakaz, i pa pli gran ki mwan. I'n konfye mwan tou eksepte ou, akoz ou son fanm. Ki mannyer eski mon pou kapab fer en keksoz osi mal e komet en pese kont Bondye?”

¹⁰ Tou le zour, i ti demann Zozef pour dormi avek li, me Zozef pa ti aksepte; i ti refize dormi avek li.

¹¹ Me en zour, Zozef ti antre kot lakaz pour fer son travay. Bann serviter ti absan.

¹² Fanm Potifar ti atrap son lenz. I ti dir li, “Vin dormi avek mwan!” Me Zozef ti les son lenz dan lanmen sa fanm e i ti tay deor.

¹³ Kan i ti war ki Zozef ti'n kit son lenz dan son lanmen e ki i ti'n sov deor,

¹⁴ i ti kriy bann serviter. I ti dir zot, “Gete! En Ebre in ganny anmennen isi pour ensilte nou. In vin kot mwan pour dormi avek mwan e mon'n kriye.

¹⁵ Ler in antann mwan kriye i'n kit son lenz lanmenm akote mwan e in tay deor.”

¹⁶ I ti gard lenz Zozef obor li ziska ki son mari ti ariv dan lakaz.

¹⁷ Alor, i ti rakont li sa menm zistwar, “Ou lesklav Ebre, ki ou'n anmenn isi, in vini pour sali mwan.

¹⁸ Me de ki mon'n kriye, i'n kit son lenz akote mwan e sov deor.”

¹⁹ Ler Potifar, son met, ti antann sa parol ki son fanm ti'n dir: La ki mannyer ou lesklav in tret mwan, son lakoler ti monte.

²⁰ Potifar ti pran Zozef e met li dan prizon kot tou prizonnyen lerwa ti ganny garde. I ti reste la, dan prizon.

²¹ SENYER ti avek Zozef; i ti montre son labonte anver li. Zozef ti ganny faver avek sa komandan prizon,

²² ki ti ansarz tou lezot prizonnyen. Tou sa ki ti annan pour fer dan prizon ti pas par li.

²³ Komandan prizon pa ti annan nanryen pour trakase, tou ti dan lanmen Zozef. SENYER ti avek li e i ti fer li reisi dan tou sa ki i ti antreprann.