Zenez 33 - Labib An Kreol Seselwa

Zakob I Rankontre Ezai

¹ Zakob ti lev son lizye e regarde. I ti war Ezai pe vini avek 400 zonm. I ti partaz son bann zanfan ant Lea ek Rasel e son de servant.

² I ti met bann servant ek zot zanfan devan, apre Lea ek son zanfan, e an dernyen Rasel ek Zozef.

³ Zakob ti al par devan e i ti prosternen set fwa ziska ki i ti ariv pre avek son frer.

⁴ Me Ezai ti taye pour al zwenn li. I ti may li dan son likou, anbras li e zot ti plere.

⁵ Kan Ezai ti lev son lizye e war bann fanm ek bann zanfan, i ti dir, “Lekel tou sa bann dimoun ki avek ou?” Zakob ti reponn, “Zot bann zanfan ki Bondye in donn mwan, ou serviter.”

⁶ Bann servant ti aprose avek zot zanfan e prosternen.

⁷ Lea ti fer parey e an dernyen Rasel avek Zozef ti vini e zot ti osi fer parey.

⁸ Ezai ti dir, “Akoz ou'n anvoy tou sa group ki mon'n rankontre par devan?” Zakob ti reponn, “Pour mwan ganny aksepte devan mon senyer.”

⁹ Ezai ti dir, “Mon annan dekwa, mon frer, gard sa ki ou annan pour ou menm.”

¹⁰ Zakob ti dir, “Non, mon sipliy ou, si ou aksepte mwan, alor, aksepte mon kado. Annefe, mon pe vin dan ou prezans konmsi dan prezans Bondye. Ou'n resevwar mwan avek bonte.

¹¹ Aksepte, mon ensiste ki ou pran kado ki mon'n donn ou, akoz Bondye in sitan bon anver mwan e akoz mon annan ase.” Zakob ti fors li e i ti aksepte.

¹² Apre, Ezai ti dir, “Annou kontiny nou semen e mon ava akonpanny ou.”

¹³ Me Zakob ti dir li, “Mon senyer i konnen ki bann zanfan i feb, e ki bann zannimo ki pe donn tete i dan mon responsabilite. Si zot mars tro bokou pandan en sel zour, zot pou mor.

¹⁴ Les mon senyer pas par devan mwan e mon ava swiv dousman dapre lepa mon zannimo ki devan mwan e dapre lepa mon bann zanfan, ziska ki mon ariv kot ou, Seir.”

¹⁵ Ezai ti dir, “Les mwan kit en pe mon bann zonm avek ou.” Me Zakob ti dir, “Pa neseser. I sifi ki mon ganny aksepte par mon senyer.”

¹⁶ Ezai ti retourn Seir.

¹⁷ Me Zakob ti al Soukot, kot i ti konstri en lakaz pour li, e fer bann park pour son bann bef. Alor, i ti apel sa landrwa Soukot, savedir, payot.

Zakob I Kanpe Sikenm

¹⁸ Zakob ti ariv sen e sof sorti Padann-Aranm, dan lavil Sikenm, ki dan pei Kanaan. I ti kanp devan lavil.

¹⁹ I ti aste sa later pour 100 pyes larzan avek bann garson Hamor, kot i ti kanpe.

²⁰ La, i ti fer en lotel e i ti apel sa landrwa: El, Bondye Izrael.