Zenez 29 - Labib An Kreol Seselwa

Zakob I Ariv kot Laban

¹ Zakob ti kontiny son vwayaz dan direksyon bann pei Les.

² I ti war en pwi dan laplenn; trwa troupo mouton ti pe repoze obor. Dan sa pwi ki bann troupo ti ganny delo. En gro ros ti kouver sa pwi.

³ Kan tou troupo ti'n fini rasanble, bann berze ti roul sa ros ki ti kouver sa pwi e donn delo zot troupo mouton. Apre, zot ti retourn sa ros dan son plas.

⁴ Zakob ti dir bann berze, “Mon bann frer, kote zot sorti?” Zot ti reponn, “Nou sorti Harann.”

⁵ I ti demann zot, “Eski zot konn Laban, garson Nahor?” Zot ti reponn, “Wi, nou konn li.”

⁶ I ti demann zot, “Eski i byen?” Zot ti reponn, “Wi! La Rasel son fiy pe vini avek son bann mouton.”

⁷ Zakob ti dir, “I ankor gran lizour; i pa ankor ler pour rasanble bann troupo. Donn delo bann mouton, apre, anmenn zot manze.”

⁸ Me zot ti dir, “Nou pa kapab fer sa tan ki tou bann troupo pa rasanble. Apre, nou ava roul sa ros ki lo pwi e nou ava donn delo nou bann mouton.”

⁹ I ti ankor pe koze, kan Rasel ti arive avek bann mouton son papa. I ti en berze.

¹⁰ Kan i ti war Rasel, fiy Laban, frer son manman avek bann mouton Laban, Zakob ti al roul sa ros ki ti ferm louvertir pwi e i ti donn delo troupo Laban, frer son manman.

¹¹ I ti anbras Rasel e konmans plere.

¹² Zakob ti dir Rasel ki i ti en parante avek son papa, ki i ti garson Rebeka. Deswit Rasel ti taye pour al dir sa son papa.

¹³ Kan Laban ti antann koz lo Zakob, garson son ser, i ti depese pour vin rankontre li. I ti may li, anbras li e anmenn li se li. Zakob ti rakont Laban tou sa ki ti'n arive.

¹⁴ Alor, Laban ti dir li, “Ou vreman mon lezo e mon laser!” Zakob ti reste pandan en mwan kot Laban.

Zakob I Travay pour Ganny Rasel

¹⁵ Laban ti dir Zakob, “Eski akoz ou mon fanmir ki ou bezwen servi mwan pour nanryen? Dir mwan ki lapey ou anvi.”

¹⁶ Laban ti annan de fiy. Pli vye ti apel Lea e pli zenn Rasel.

¹⁷ Lea ti annan lizye mor, tandis ki Rasel ti vreman en zoli fiy.

¹⁸ Zakob ti kontan Rasel. I ti dir avek Laban, “Mon ava servi ou pandan set an e ou ava donn mwan ou pli zenn fiy Rasel.”

¹⁹ Laban ti dir, “Mon prefere donn ou li, plito ki donn li en lot zonm. Reste kot mwan.”

²⁰ Alor, Zakob ti servi Laban pandan set an pour Rasel. Sa letan ti pas tre vit, akoz lanmour ki i ti annan pour Rasel.

²¹ Apre sa, Zakob ti dir Laban, “Donn mwan mon fanm pour mwan marye avek li. Mon letan in fini.”

²² Alor, Laban ti rasanble tou bann zonm dan sa landrwa e fer en lafet.

²³ Me aswar, Laban ti anmenn Lea kot Zakob. Zakob ti dormi avek li.

²⁴ Laban ti donn Lea, son servant Zilpa koman servant.

²⁵ Lannmen bomaten, Zakob ti sirprann pour war ki Lea ki ti avek li. I ti dir Laban, “Ki ou'n fer avek mwan la? Pa mon'n servi ou pour Rasel? Akoz alor, ou'n tronp mwan?”

²⁶ Laban ti dir, “Nou koutim pa permet nou fer marye pli zenn fiy avan lene.

²⁷ Fini ou semenn lafet maryaz, e nou ava donn ou lot osi. Ou ava travay pour mwan pour ankor set an.”

²⁸ Zakob ti fer sa, e i ti fini son semenn lafet. Apre lafet, Laban ti donn li Rasel koman son fanm.

²⁹ Laban ti donn Bila koman servant Rasel.

³⁰ Alor, Zakob ti pran Rasel osi, me i ti kontan Rasel plis ki Lea. I ti travay pour Laban pandan ankor set an.

Bann Zanfan Zakob

³¹ SENYER ti war ki Zakob pa ti kontan Lea. Alor, i ti rann li fertil, tandis ki Rasel li, ti steril.

³² Lea ti ansent e donn nesans en garson ki i ti apel Riben, savedir gete, i en garson. I ti dir, “SENYER in war mon soufrans. Aprezan, mon mari pou kontan mwan.”

³³ I ti ansent ankor e i ti ganny en garson. I ti dir, “SENYER in antann mwan, in war ki mon mari pa ti kontan mwan e in donn mwan ankor sa garson.” I ti apel li Simeon, savedir, in tande.

³⁴ I ti ansent ankor e donn nesans en garson. I ti dir, “Aprezan, mon mari pou atase avek mwan, la ki mon'n donn li trwa garson.” I ti apel li Levi, savedir, atase.

³⁵ I ti ansent ankor e donn nesans en garson. I ti dir, “Safwasi, mon pou loue SENYER.” I ti apel li Zida, savedir, selebre. Apre sa, i ti aret ganny zanfan.