Zenez 25 - Labib An Kreol Seselwa

Lezot Desandans Abrahanm

¹ Abrahanm ti annan en lot fanm ki ti apel, Ketoura.

² I ti donn li sa bann zanfan: Zimrann, Yoksann, Medann, Madyann, Yisbak e Soua.

³ Yoksann ti papa Seba ek Dedann. Bann garson Dedann ti donn bann Asourit, Letousit ek Leoumit.

⁴ Bann garson Madyann ti Efa, Efer, Henok, Abida, e Elda. Sa ti bann garson Ketoura.

⁵ Abrahanm ti donn Izaak tou son byen.

⁶ Kanta bann zanfan son bann menazer, Abrahanm ti donn zot bann kado, e pandan ki i ti ankor vivan, i ti anvoy zot dan pei dan kote Les, lwen avek son garson, Izaak.

Lanmor Abrahanm

⁷ Abrahanm ti viv ziska laz 175 an.

⁸ Apre en lavyeyes ere, Abrahanm ti mor e i ti ganny antere.

⁹ Son de garson, Izaak ek Ismael, ti depoz li dan kavern Makpela, Les avek Manmre, dan propriyete Efronn, garson Soar, sa Hitit.

¹⁰ Sa ti propriyete ki Abrahanm ti'n aste avek bann Hitit. Abrahanm ti ganny antere la, avek son fanm, Sara.

¹¹ Apre lanmor Abrahanm, Bondye ti beni Izaak son garson. Izaak ti reste pre kot pwi Lahai-Roi.

Desandans Ismael

¹² La desandans Ismael, garson ki Abrahanm ti fer avek Agar, sa lesklav Ezipsyen, servant Sara.

¹³ La non bann garson Ismael dapre son desandans dan lord nesans: Nebayot, Kedar, Adbeel, Mibsanm,

¹⁴ Misma, Douma, Masa,

¹⁵ Hadad, Tema, Yetour, Nafis, e Kedma.

¹⁶ Sa ti non bann garson Ismael par vilaz ek kanpman, 12 sef zot tribi.

¹⁷ Ismael ti viv ziska laz 137 an. I ti mor e i ti ganny antere.

¹⁸ Bann Ismaelit ti reste dan rezyon ant Havila ek Sour, pre avek Lezip, dan direksyon Asiri, lwen avek tou leres zot bann frer.

Nesans Ezai ek Zakob

¹⁹ La bann desandans Izaak, garson Abrahanm: Abrahanm ti papa Izaak.

²⁰ Izaak ti annan 40 an kan i ti marye avek Rebeka, fiy Betouel, en Arameen sorti Padann-Aranm, e ser Laban, li osi Arameen.

²¹ Izaak ti priy SENYER pour son fanm, akoz i pa ti kapab ganny zanfan. SENYER ti pran pitye pour li e Rebeka son fanm ti tonm ansent.

²² Son de pti baba ki ti pou ne, ti lager dan son vant e i ti dir, “Si i pou konmsa i pa vo lapenn ansent?” Alor i ti konsilte SENYER.

²³ SENYER ti reponn li: I annan de nasyon dan ou vant, ou pou donn nesans de nasyon. Enn pou pli for ki lot, e sa enn ki pli gran pou servi sa enn ki pli pti.

²⁴ Kan letan lakousman ti arive, Rebeka ti ganny zimo.

²⁵ Premye ki ti ne, son lekor ti kouver avek pwal. Alor, zot ti apel li Ezai.

²⁶ Kan son frer ti sorti, son lanmen ti pe atrap talon Ezai. Alor zot ti apel li Zakob. Izaak ti annan 60 an kan zot ti ne.

²⁷ Sa de garson ti grandi, Ezai ti vin en bon saser, en zonm ki ti pas letan dan lakanpanny, tandis ki Zakob ti en zonm trankil ki ti reste dan latant.

²⁸ Izaak ti prefer Ezai akoz i ti kontan manz zibye ki i ti sase, tandis ki Rebeka ti prefer Zakob.

²⁹ En zour kan Zakob ti pe kwi en lasoup, Ezai ti arive tre fatige sorti lasas.

³⁰ Ezai ti dir Zakob, “Les mwan manz en pe ou lasoup rouz, akoz mon lafen!” Alor i ti ganny apele Edonm, setadir rouz.

³¹ Zakob ti dir, “Dabor, vann mwan ou drwa lene garson.”

³² Ezai ti dir, “Mon pre pour mor. Ki mon pou fer avek drwa lene garson?”

³³ Alor, Zakob ti dir, “Fer en serman avan.” Alor i ti fer en serman avek li, e Ezai ti vann Zakob son drwa lene garson.

³⁴ Zakob ti donn Ezai dipen ek lasoup lantir. I ti manze e bwar. Apre, i ti ale. Konmsa ki Ezai ti montre ki i ti napa lentere pour son drwa lene garson.