Zenez 22 - Labib An Kreol Seselwa

Bondye I Demann Abrahanm pour Ofer Izaak Koman Sakrifis

¹ Apre, Bondye ti teste Abrahanm. I ti dir li, “Abrahanm!” Abrahanm ti reponn, “Wi, la mon la.”

² Bondye ti dir, “Pran ou garson, ou sel garson, sa enn ki ou kontan, Izaak. Al dan pei Moriya e ofer li koman en sakrifis lo en montanny ki mon pou montre ou.”

³ Lannmen, Abrahanm ti lev granmaten, prepar son bourik, e pran de serviter ek son garson Izaak, avek dibwa pour sakrifis. I ti pran semen pour al dan sa landrwa ki Bondye ti'n endik li.

⁴ Trwazyenm zour, Abrahanm ti lev lizye e war sa landrwa dan lwen.

⁵ I ti dir sa de serviter, “Reste isi avek bourik; mwan ek mon garson, nou ava al lao pour ador Bondye. Apre, nou ava retournen.”

⁶ Abrahanm ti pran dibwa pour lofrann e donn son garson Izaak pour anmennen; li, i ti anmenn kouto ek dife. Alor, tou le de ti kontiny semen.

⁷ Izaak ti dir son papa, Abrahanm, “Papa!” Abrahanm ti reponn, “Wi, mon garson.” Izaak ti demann li, “Nou annan dibwa ek dife; me oli zenn mouton pour sakrifis?”

⁸ Abrahanm ti dir, “Mon garson, Bondye li menm pou donn en zenn mouton pour sakrifis.” Zot ti kontiny zot semen ansanm.

⁹ Kan zot ti ariv dan sa landrwa ki Bondye ti'n endik li, Abrahanm ti fer en lotel, aranz dibwa lo la, anmar son garson Izaak e met li lo lotel, anler lo dibwa.

¹⁰ Apre, Abrahanm ti anvoy son lanmen e pran kouto pour egorz son garson.

¹¹ Alor, lanz SENYER dan lesyel ti apel Abrahanm. I ti dir li, “Abrahanm, Abrahanm!” Abrahanm ti reponn, “Wi! La mon la.”

¹² Lanz SENYER ti dir, “Pa fer nanryen sa garson, pa fer li okenn dimal. Aprezan, mon konnen ki ou annan respe pour Bondye, e ki ou pa'n refize ofer mwan ou garson, ou sel garson.”

¹³ Abrahanm ti lev lizye e apersevwar en mouton mal ki ti'n pri dan brousay par son korn. I ti pran sa mouton e ofer li koman en sakrifis dan plas son garson.

¹⁴ Alor, Abrahanm ti apel sa landrwa: SENYER i pran swen. Pour sa rezon, zot dir konmela: Lo montanny, SENYER pou donnen.

¹⁵ Lanz SENYER ti apel Abrahanm pour en dezyenm fwa depi lesyel.

¹⁶ I ti dir li, “Mon fer sa serman par mon non. La sa ki SENYER i deklare: Akoz ou'n fer sa e ou pa'n refize ofer ou garson, ou sel garson,

¹⁷ mon pou beni ou. Mon pou ogmant ou desandans e fer zot vin parey zetwal dan lesyel e parey bann gren disab lo bor lanmer. Ou desandans pou pran posesyon bann lavil zot bann lennmi.

¹⁸ Atraver ou desandans, tou nasyon lo later pou ganny beni, akoz ou'n ekout mon lavwa.”

¹⁹ Abrahanm ti retourn kot son bann serviter e ansanm, zot ti retourn Berseba kot Abrahanm ti'n etabli li.

Desandans Nahor

²⁰ Plitar, Abrahanm ti ganny dir: Ou frer Nahor i'n ganny sa bann zanfan avek Milka:

²¹ Ous, son premye zanfan; Bouz, son frer; Kemouel, papa Aranm;

²² Kesed, Hazo, Pildas, Yidlaf, ek Betouel.

²³ Betouel ti papa Rebeka. An tou, Milka ti donn Nahor, frer Abrahanm, wit garson.

²⁴ Anplis, i ti annan en menazer ki ti apel Reouma, ki ti donn li Teba, Gahanm, Tahas ek Maaka.