Zenez 16 - Labib An Kreol Seselwa

Nesans Ismael

¹ Sarai, fanm Abranm pa ti'n donn li zanfan. I ti annan en servant Ezipsyen ki ti apel Agar.

² Sarai ti dir Abranm, “SENYER in anpes mwan fer zanfan; al dormi avek mon servant. Petet i ava kapab fer zanfan pour mwan.” Abranm ti ekout sa ki Sarai ti dir.

³ Apre ki Abranm ti'n reste dan later Kanaan pour 10 an, Sarai, fanm Abranm, ti pran Agar, son servant Ezipsyen e donn Abranm, son mari, pour fer li vin son fanm.

⁴ I ti al dormi avek Agar, e fer li ansent. De ki Agar ti remarke ki i ti ansent, i ti vin arogan e get Sarai avek mepri.

⁵ Alor, Sarai ti dir Abranm, “Ou ava responsab konsekans bann lensilt ki mon pe gannyen. Mon'n donn ou mon servant pour dormi avek, e depi ki i konnen ki i ansent, in konmans ay mwan. SENYER ava vin ziz ant mwan ek ou!”

⁶ Me Abranm ti dir Sarai, “Gete! Ou servant i anba ou pouvwar; fer sa ki oule avek li.” Apre sa, Sarai ti konmans maltret Agar ki ti bezwen sove.

⁷ Lanz SENYER ti trouv li obor en sours delo dan dezer lo semen Sour.

⁸ I ti dir li, “Agar, servant Sarai, kote ou sorti e kote ou pe ale?” I ti reponn, “Mon pe sov Sarai, mon bourzwa.”

⁹ Lanz SENYER ti dir li, “Retourn kot ou bourzwa, e obei li.”

¹⁰ Lanz SENYER ti osi dir li, “Mon pou sitan ogmant ou desandans, ki personn pa pou kapab konte.”

¹¹ Lanz SENYER ti dir li, “Ou ansent e ou pou donn nesans en garson. Ou ava apel li Ismael, akoz SENYER in antann ou dan ou detres.

¹² I pou vin parey en bourik sovaz. I pou lager kont tou zonm e tou zonm pou lager kont li. I pou viv tousel, lwen avek lezot son bann frer.”

¹³ Alor, Agar ti apel SENYER ki ti'n koz avek li, “Ou, ou El-Roi, sa Bondye ki war mwan. Mon demande, si mon'n war Sa Enn ki war mwan?”

¹⁴ Alor, sa pwi delo ant Kades ek Bered ti ganny apele Lahai-Roi, savedir, sa Bondye ki war mwan.

¹⁵ Agar ti ganny en garson pour Abranm; e Abranm ti apel son garson ki i ti gannyen avek Agar, Ismael.

¹⁶ Abranm ti annan 86 an kan Agar ti donn nesans Ismael pour li.