Zenez 15 - Labib An Kreol Seselwa

Bondye I Fer Lalyans avek Abranm

¹ Apre sa bann levennman, SENYER ti koz avek Abranm dan en vizyon. I ti dir li, “Abranm! Pa bezwen per. Mwan ou boukliye dan danze. Mon pou donn ou en gran rekonpans.”

² Abranm ti reponn, “Senyer BONDYE, ki ou pou donn mwan? Mon napa zanfan e mon zeritye se Eliezer ki sorti Damas.

³ Ou pa'n donn mwan en desandan, se enn mon serviter ki pou vin mon zeritye.”

⁴ SENYER ti dir li, “Pa sa zonm ki pou vin ou zeritye, me sa enn ki pou sorti avek ou. Se ou prop garson ki pou vin ou zeritye.”

⁵ SENYER ti anmenn li deor e dir li, “Lev ou lizye anler, get lesyel, e kont bann zetwal si ou kapab; la ki mannyer ou desandans pou ete.”

⁶ Abranm ti met son lafwa dan SENYER. SENYER ti rekonnet li koman en zonm zis.

⁷ I ti dir li, “Mwan menm SENYER ki'n fer ou sorti Our, dan pei bann Kaldeen pour donn ou sa pei koman ou posesyon.”

⁸ Abranm ti dir, “Senyer BONDYE, ki mannyer mon pou konnen ki mon pou posed sa pei?”

⁹ SENYER ti dir li, “Anmenn en zenis 3 an, en femel kabri 3 an, en mouton mal 3 an, en tourtrel ek en zenn pizon.”

¹⁰ Abranm ti anmenn tou sa bann zannimo. I ti fann zot tou an de e plas sak morso vizavi lot; me i pa ti koup bann zwazo.

¹¹ Bann zwazo rapas ti vin manz sa bann karkas, me Abranm ti sas zot.

¹² Kan soley ti pe al kouse, Abranm ti tonm dan en profon sonmey. Lafreyer ek fernwanr ti kouver li.

¹³ SENYER ti dir li, “Mon oule fer ou konnen ki ou bann desandan pou reste dan en pei etranze ki pa pour zot. Zot pou vin lesklav laba e ganny martirize pandan 400 an.

¹⁴ Me, mon pou ziz sa pep ki pou fer zot vin lesklav. Alor, zot ava kapab kit sa pei avek bokou larises.

¹⁵ Ou, apre en long vyeyes, ou pou mor anpe.

¹⁶ Katriyenm zenerasyon ou desandans pou retourn isi, akoz kriyote bann Amorit pa ankor ariv lo son nivo.”

¹⁷ Kan soley ti'n kouse e fernwanr ti fer, en sel kou, en brazye kot ti sorti lafimen ek laflanm ti aparet e pas ant bann morso zannimo.

¹⁸ Sa zour, SENYER ti fer son lalyans avek Abranm. I ti dir, “Mon pou donn ou desandans, sa pei antye, depi larivyer Lezip ziska gran larivyer Efrat.

¹⁹ Sa i teritwar Kenit, Kenizit, Kadmonit,

²⁰ Hitit, Perizit, Refait,

²¹ Amorit, Kananeen, Girgasit ek Zebizit.”