Zenez 14 - Labib An Kreol Seselwa

Abranm I Al Sov Lot

¹ Dan sa lepok, Anmrafel, lerwa Sinear, Aryok, lerwa Elasar, Kedorlaomer, lerwa Elanm, ek Tidal, lerwa Goim

² ti al lager kont Bera, lerwa Sodonm, Birsa, lerwa Gomor, Sinab, lerwa Adma, Semeber, lerwa Seboim ek lerwa Bela, setadir Soar.

³ Zot ti met zot lafors ansanm dan vale Sidim, ozordi lanmer Mor.

⁴ Pandan 12 an, zot ti'n soumet zot dan servis lerwa Kedorlaomer, me dan trezyenm lannen, zot ti revolte.

⁵ Katorzyenm lannen, Kedorlaomer ti fer en kanpanny lager ansanm avek bann lerwa ki ti alye avek li. I ti bat bann Refait, Asterot-Karnaim, bann Zouzit, dan lavil Hanm, bann Emit, dan laplenn Kiryataim.

⁶ I ti bat bann Horit se zot dan bann montanny Seir e sas zot ziska El-Parann, pre avek dezer.

⁷ Apre, zot ti retourn ver Enn-Mispat, setadir Kades. Zot ti pran teritwar bann Amalesit ek bann Amorit ki ti reste Hasasonn-Tamar.

⁸ Alor, bann lerwa Sodonm, Gomor, Adma, Seboim ek Bela, setadir Soar, ti sorti avek zot larme. Dan vale Sidim, zot ti pran pozisyon lager kont

⁹ Kedorlaomer, lerwa Elanm, Tidal, lerwa Goim, Anmrafel, lerwa Mezopotami, Aryok, lerwa Elasar. Kat lerwa ti pe lager kont senk.

¹⁰ Ti annan en kantite pwi goudron dan vale Sidim e kan bann lerwa Sodonm ek Gomor ti pe sove, zot ti tonm dan sa bann pwi. Bann sirvivan ti sov dan montanny.

¹¹ Bann venker ti pran tou bann byen dan Sodonm ek Gomor. Zot ti pran osi tou bann provizyon e zot ti ale.

¹² Zot ti osi pran Lot, neve Abranm, ki ti reste Sodonm, prizonnyen, avek tou sa ki i ti posede.

¹³ En zonm ki ti'n reisi sove ti al anons Abranm, sa Ebre, ki ti pe reste pre avek bann gran pye dibwa sakre Manmre, sa Amorit, frer Eskol ek Aner, ki ti bann alye Abranm.

¹⁴ Kan Abranm ti'n tande ki enn son fanmir ti'n ganny pran prizonnyen, i ti ralye 318 parmi son bann pli bon gerye e i ti al pourswiv sa kat lerwa ziska Dann.

¹⁵ Abranm ti diviz son bann serviter an plizyer group e atak zot aswar. I ti bat zot e pourswiv zot ziska Hoba, dan Nor avek Damas.

¹⁶ I ti reganny tou bann byen. I ti osi reganny son neve, Lot, bann fanm ek lezot prizonnyen.

Melkisedek I Beni Abranm

¹⁷ Kan Abranm ti retournen apre son laviktwar lo Kedorlaomer ek lezot lerwa ki ti avek li, lerwa Sodonm ti vin zwenn li dan Vale Save, setadir, Vale Lerwa.

¹⁸ Melkisedek, ki ti lerwa Salenm e pret Bondye Toupwisan, ti anmenn dipen ek diven.

¹⁹ I ti beni Abranm an dizan: Bondye Treo, ki'n kree lesyel ek later! Beni Abranm.

²⁰ Loue Bondye Treo, ki'n livre ou lennmi dan ou lanmen! Abranm ti donn Melkisedek en dizyenm lo tou sa ki i ti'n pran.

²¹ Lerwa Sodonm ti dir Abranm, “Donn mwan bann dimoun, me gard bann byen pour ou.”

²² Me Abranm ti reponn li, “Mon lev mon lanmen devan SENYER, Bondye Treo ki'n kree lesyel ek later:

²³ Mon pa pou pran ni en bren difil, ni en baret sandal, ni nanryen ki pour ou. Konmsa, ou pa pou kapab dir: Mwan ki'n fer Abranm ris.

²⁴ Mwan, mon pa pou pran nanryen, eksepte sa ki bann zennzan in manze. Les bann zonm ki avek mwan: Aner, Eskol ek Manmre pran zot par.”