Zakari 3 - Labib An Kreol Seselwa

Katriyenm Vizyon: Gran-Pret Zozye

¹ Apre sa, SENYER ti fer mwan war Gran-Pret Zozye ki ti pe debout devan lanz SENYER. Satan ti pe debout lo son kote dwrat pour akiz li.

² Lanz SENYER ti dir li: Satan! SENYER i defann ou koze. Wi! SENYER ki'n fer son swa lo Zerizalenm. In fer ou gard silans. Eski sa zonm, pa i en tizon ki'n ganny pran dan dife?

³ Zozye ti pe debout devan lanz dan en lenz sal.

⁴ Lanz ti dir sa bann dimoun ki ti pe debout devan li, “Tir sa lenz sal lo li.” I ti dir avek Zozye, “Gete! La mon debaras ou avek ou pese; mon pou abiy ou dan lenz lafet.”

⁵ Mon ti dir, “Met en tirban prop lo son latet!” Alor zot ti met en tirban prop lo son latet e abiy li dan lenz lafet. Lanz SENYER ti pe debout akote.

⁶ Apre sa, lanz SENYER ti dir Zozye:

⁷ La sa ki SENYER liniver i deklare: Si ou swiv mon semen e gard mon komannman, ou pou gouvern mon tanp e pran ansarz bann lakour mon tanp. Mon pou met ou lo menm ran avek sa bann ki la pe debout.

⁸ Zozye! Ou ki Gran-Pret! Mon demann ou, ek ou bann koleg ki asiz devan ou, mon demann ou ekoute aprezan. Sa bann zonm i anons lavenir: Mon pe fer vin mon serviter ki apel Bourzon.

⁹ Annefe, la sa ki SENYER liniver i deklare: Lo sa ros ki mon'n plas devan Zozye, sa ros rar, ki annan set kote, mwan menm ki pou grav son lenskripsyon; e dan en sel zour, mon pou efas pese sa pei.

¹⁰ SENYER liniver ki deklare: Sa zour, zot pou envit kanmarad anba zot pye rezen oubyen anba zot pye fig.