Zakari 13 - Labib An Kreol Seselwa

¹ Sa zour, en sours pou ouver pour tribi David e pour bann zabitan Zerizalenm. I pou pirifye zot pese ek zot bann lespri enpir.

Idolatri ek Fo Profet Pou Disparet

² La sa ki SENYER liniver i deklare: Mon pou debaras pei avek non bann zidol e personn pa pou mazin zot ankor. Mon pou osi debaras pei avek bann profet ek zot lanvi enpir.

³ Si zanmen okenn profet i aparet ankor, zot papa ek zot manman ki ti fer zot, pou dir zot: Zot pa pou viv, akoz zot koz lalang lo non SENYER. Alor, zot papa e zot manman pou touy zot, pandan ki zot profetize.

⁴ Sa zour, tou bann profet pou kanmi kan zot ava profetiz lo zot bann vizyon. Zot pa pou met en lenz profet pour zot tronp dimoun,

⁵ me sakenn zot pou dir: Mon pa en profet, mon en fermye; mon ti menm annan later depi dan mon lazenes.

⁶ Si nenport ki dimoun i demann zot: Kote ou'n ganny sa bann blesir ki lo ou ledo? Zot pou reponn: Mon ti ganny blese dan lakaz mon bann met.

Lalyans I Ganny Renouvle

⁷ La sa ki SENYER liniver i deklare: Lepe! Leve kont mon berze, kont mon zanmi pros. Atak berze pour dispers bann mouton; mon lanmen pou atak bann ki pti.

⁸ La sa ki SENYER i deklare: Alor, dan pei antye, de tyer bann zabitan pou mor, e en tyer pou ganny sove.

⁹ Mon pou zet sa dernyen tyer dan dife. Mon pou fer li fonn parey ou fer fonn larzan. Mon pou teste li parey ou teste lor. I pou envok mon non e mon pou egzos li. Mon pou dir: Ou menm mon pep! Zot ava reponn: SENYER ki nou Bondye!