Zakari 12 - Labib An Kreol Seselwa

Zerizalenm Pou Ganny Delivre

¹ En proklanmasyon sorti kot SENYER lo size Izrael: La sa ki SENYER ki'n tal lesyel e kree later, ki'n donn zonm lavi, i deklare:

² Mon pou fer Zerizalenm vin parey en lakoup ki soul tou bann pep dan zalantour. Zida osi pou pas parey, kan Zerizalenm pou ganny anserkle.

³ Sa zour, mon pou fer Zerizalenm vin parey en gro ros lour. Dimoun ki pou esey lev li pou ganny blese. Tou bann nasyon lo later pou ralye kont li.

⁴ La sa ki SENYER i deklare: Sa zour, mon pou fer per tou zot seval e rann fou zot kavalye. Me letan mon frap bann seval bann nasyon e fer zot vin aveg, mon pou vey lo tribi Zida.

⁵ Alor bann sef dan Zida ava dir dan zot menm: Lafors bann zabitan Zerizalenm i sorti kot SENYER liniver, zot Bondye.

⁶ Sa zour, mon pou fer bann sef Zida vin parey en dife ki pe kouve anba en ta dibwa, parey en tors alimen dan bann ta dible. I pou devor tou bann pep dan zalantour, adrwat e agos. Me Zerizalenm pa pou bouze.

⁷ SENYER pou sov bann fanmir Zida an premye. Konmsa, laglwar tribi David e laglwar zabitan Zerizalenm pa pou siperyer ki pour Zida.

⁸ Sa zour, SENYER pou protez bann zabitan Zerizalenm. Konmsa, sa enn ki pli feb parmi zot, ava parey David e desandan David pou vin parey Bondye pour zot, parey lanz SENYER ki mars devan zot.

Dey partou dan Pei

⁹ Sa zour, mon pou fer tou pou detri tou bann nasyon ki vin atak Zerizalenm.

¹⁰ Mon pou repann lo tribi David e lo bann zabitan Zerizalenm, en lespri konpasyon ek siplikasyon. Konmsa, kan zot ava lev lizye ver mwan ki zot in transperse, zot ava plere, parey sa enn ki pler son sel garson avek bokou tristes, parey sa enn ki plere lo son premye zanfan.

¹¹ Sa zour, dimoun pou plere dan Zerizalenm parey ler ti annan dey pour Hadad-Rimonn, dan laplenn Megido.

¹² Sak fanmir dan pei antye pou an dey, sakenn lo son kote. Bann fanmir David pou fer dey apar; bann zonm ek bann fanm separeman. Bann fanmir Natan pou plere apar, zonm ek fanm separeman.

¹³ Bann fanmir Levi pou fer dey apar; zonm ek fanm separeman. Bann Simeit pou fer dey apar, zonm ek fanm separeman.

¹⁴ Tou lezot fanmir pou fer dey apar, zonm ek fanm separeman.