Sofoni 3 - Labib An Kreol Seselwa

Pese Zerizalenm

¹ Maler lo lavil rebel, lavil koronpi, lavil diktater!

² I pa'n ekout personn; i'n refize ganny korize. I pa'n met son konfyans dan SENYER; i pa'n oule apros kot son Bondye.

³ Son bann sef i parey bann lyon ki pe kriye. Son bann ziz i parey bann loulou ki fer lasas aswar. Kan bomaten i fer, zot napa nanryen pour manze.

⁴ Son bann profet i en bann bandi ki pe tronp dimoun. Son bann pret in mank respe pour sa ki sakre; zot in vyol lalwa.

⁵ Dan lavil, SENYER i montre lazistis. I pa fer nanryen ki enzis. Tou le bomaten, san zanmen manke, i rann son zizman. Malgre sa, malfeter i azir san okenn laont.

⁶ Mon'n fer bann nasyon disparet. Mon'n demoli zot miray defans. Mon'n fer zot semen vin en ta debri, kot personn pa pase. Zot bann lavil in ganny detri, i nepli annan okenn zabitan.

⁷ Mon ti dir: Sirman ki lavil ava annan respe pour mwan, ki i ava aksepte ganny korize, e ki mon pa ti ava bezwen egzekit mon bann menas kont li. Me zot ti depese pour azir pli mal ankor.

Pinisyon ek Konversyon bann Nasyon

⁸ La sa ki SENYER i deklare: Esper mwan! Espere zour mon leve pour akiz zot. Mon'n deside rasanble bann nasyon, bann rwayonm, pour fer zot santi pwa mon gran lakoler. Mon pou detri pei antye par dife mon lakoler terib.

Bondye Pou Transform bann Pep

⁹ Alor, mon pou pirifye labous bann pep, pour ki zot tou, zot envok non SENYER e servi mwan avek en menm leker.

¹⁰ Depi lot kote bann larivyer Letyopi, mon bann adorater, bann ki mon'n disperse, pou anmenn zot lofrann kot mwan.

Konversyon Izrael

¹¹ Sa zour, ou pou nepli onte akoz ou bann move aksyon ki ti fer ou revolte kont mwan. Mon pou fer disparet parmi zot, tou bann ki fyer e arogan. Ou ava arete montre ou lorgey lo mon montanny sen.

¹² Mon pou kit parmi zot, en pep senp e pov. Zot pou rod proteksyon dan non SENYER.

¹³ Leres sirvivan Izrael pa pou fer sa ki mal. Zot pou nepli koz manti. Zot pou nepli tronp dimoun par zot parol. Zot pou viv e dormi anpe. Personn pa pou fer zot per.

Restorasyon Zerizalenm

¹⁴ Lavil Siyon! Kriye dan lazwa. Zabitan Izrael! Selebre. Zerizalenm! Sante avek tou ou leker.

¹⁵ SENYER in retir tou zizman kont ou. I'n detourn tou ou bann lennmi. SENYER, lerwa Izrael i parmi ou. Ou pa bezwen per okenn maler ankor.

¹⁶ Sa zour, zot pou dir Zerizalenm: Lavil Siyon! Pa per. Pa dekouraze!

¹⁷ SENYER, ou Bondye i la avek ou, koman en gerye ki donn laviktwar. I dan gran lazwa akoz ou. Dan son lanmour, i pou donn ou en nouvo lavi; dan lazwa, i selebre akoz ou.

¹⁸ Mon pou rasanble bann ki ti dan sagren, lwen avek bann lafet. Mon pou ekart maler lwen avek ou, pour ki ou nepli kouver avek laont.

¹⁹ Dan sa lepok, mon pou pini bann ki maltret ou. Mon pou sov sa enn ki bwete. Mon pou rasanble bann ki'n ganny disperse. Mon pou retabli zot loner e fer zot renonmen dan tou bann pei kot zot ti onte.

²⁰ La sa ki SENYER i deklare: Dan sa letan, mon pour fer zot retournen; dan sa letan, mon pou rasanble zot. Mon pou sanz zot sityasyon devan zot lizye. Mon pou donn zot en renonmen e elev zot loner parmi bann nasyon.