Sofoni 1 - Labib An Kreol Seselwa

¹ SENYER ti koz avek Sofoni, garson Kousi, garson Gedalya, garson Amaria, garson Ezekyas, dan lepok ki Zozyas, garson Amonn, ti lerwa Zida.

Zour Zizman Bondye kont Later

² La sa ki SENYER i deklare: Mon pou konpletman detri tou sa ki lo later.

³ Mon pou fer disparet tou et imen ek tou zannimo, bann zwazo dan lesyel ek bann pwason dan lanmer. Mon pou fer tonbe bann malfeter ek bann ki pous zot pour mal azir. Mon pou fer disparet tou bann et imen lo later, SENYER ki deklare.

Zizman kont Zida

⁴ Mon pou lev mon lanmen kont Zida e kont tou zabitan Zerizalenm. Mon pou fer disparet dan sa landrwa, bann Baal ki reste, menm non bann pret ki ti servi li.

⁵ Mon pou fer disparet bann ki mont lo twa zot lakaz pour ador bann zetwal; bann ki prostern devan mwan, me ki anmenmtan pe pret serman lo non Molek.

⁶ Zot in tourn ledo avek SENYER, e pa'n rod SENYER ni konsilte li.

⁷ Fer silans devan Senyer BONDYE! Akoz zour zizman SENYER i pros. SENYER in prepar en sakrifis; i'n konsakre son bann envite.

⁸ Zour sakrifis SENYER, mon pou regle kont avek bann sef, bann garson lerwa, e tou bann ki met bann lenz etranze.

⁹ Sa zour, mon pou fer rann kont tou sa bann ki travers laport tanp, e ki ranpli tanp zot SENYER avek vyolans ek frod.

¹⁰ La sa ki SENYER i deklare: Sa zour, zot pou antann kriye depi Laport Pwason. Zot pou antann irlman sorti dan Nouvo lavil; e en gran tapaz sorti dan kolin.

¹¹ Bann zabitan ki dan leba lavil! Kriye. Tou bann marsan in ganny detri. Tou bann ki pez larzan in ganny touye.

¹² Dan sa lepok, mon pou pran en lalanp; mon pou fouy dan Zerizalenm. Mon pou pran aksyon kont bann zonm ki viv trankilman e ki les lanmar poze parey dan en fon boutey. Zot dir: SENYER pa fer ni sa ki byen, ni sa ki mal.

¹³ Zot larises pou ganny pran. Zot lakaz pou ganny detri. Zot pou konstrir lakaz, me zot pa pou reste ladan. Zot pou plant rezen, me zot pa pou bwar son diven.

Zour Senyer

¹⁴ Sa gran zour SENYER i pros; i tre pros, i pe arive byen vit. Menm bann gerye i kriy osekour.

¹⁵ Sa zour pou en zour lakoler, en zour maler, en zour tourman ek destriksyon, en zour fernwanr, kouver avek nyaz epe.

¹⁶ Sa zour, zot pou antann son tronpet, tapaz lager kont bann lavil fortifye, e kont bann fortres.

¹⁷ Mon pou anvoy maler lo bann imen. Zot pou mars parey bann aveg, akoz zot in fer pese kont SENYER. Disan pou fannen parey lapousyer e zot laser pou parey salte.

¹⁸ Ni zot larzan, ni zot lor pa pou kapab sov zot. Dife son zalouzi pou devor later antye. Sa pou en destriksyon terib. Tou zabitan later pou ganny eksterminen.