Romen 8 - Labib An Kreol Seselwa

Lavi avek Lespri Bondye

¹ Aprezan, i nepli annan okenn kondannasyon pour sa bann ki ini avek Zezi-Kri.

² Annefe, Lalwa Lespri ki donn lavi par Zezi-Kri, in rann mwan lib anver lalwa pese ek lanmor.

³ Bondye in fer sa ki Lalwa Moiz pa ti kapab, akoz febles natir imen ti rann lalwa enpwisan. Bondye in anvoy son prop Garson dan en natir parey natir pese. I'n kondann pese dan natir imen.

⁴ I'n fer sa pour satisfer bann egzizans Lalwa dan nou ki nepli viv dapre nou prop natir, me dapre Lespri.

⁵ Annefe, bann ki viv dapre zot prop natir, zot ganny kontrole par sa ki zot natir i demann zot. Me bann ki viv dapre Lespri, zot ganny kontrole par sa ki Lespri i demande.

⁶ Kan nou dezir i ganny kontrole par natir imen, i anmenn lanmor. Me kan nou dezir i ganny kontrole par Lespri, i anmenn lavi ek lape.

⁷ Si en dimoun i les li ganny kontrole par son natir imen, i vin lennmi Bondye. Annefe, i pa soumet li avek Lalwa Bondye e i menm enkapab fer li.

⁸ Sa enn ki anba kontrol son prop natir, pa kapab fer plezir Bondye.

⁹ Kanta zot, zot pa viv anba kontrol natir imen. Zot viv anba kontrol Lespri, si vreman Lespri Bondye i reste dan zot. Sa enn ki napa Lespri Kris, pa pour Kris.

¹⁰ Si Kris i dan zot, zot lekor pou kanmenm mor akoz pese. Me Lespri li, i lavi dan zot, akoz zot in ganny zistifye devan Bondye.

¹¹ Si Lespri Bondye ki'n resisit Kris i reste dan zot, alor, sa enn ki'n resisit Kris, pou donn osi lavi zot lekor mortel par son Lespri ki dan zot.

¹² Alor, mon bann frer ek ser! Nou annan en det, non pa anver nou prop natir, pour viv dapre son bann dezir.

¹³ Annefe, si zot viv dapre zot prop natir, zot pou mor. Me si par Lespri, zot touy bann aksyon zot natir egois, zot ava viv.

¹⁴ Tou dimoun ki les li ganny gide par Lespri Bondye, zot bann zanfan Bondye.

¹⁵ Annefe, zot pa'n resevwar en Lespri ki rann zot lesklav, ki ranpli zot ankor avek lafreyer. Me zot in resevwar en Lespri ki fer zot vin zanfan Bondye e ki permet nou kriye: Aba! Mon Papa!

¹⁶ Lespri Bondye li menm i rann temwannyaz ki nou zanfan Bondye.

¹⁷ E si nou son bann zanfan, alor, nou osi son bann zeritye: Zeritye Bondye, e zeritye ansanm avek Kris, akoz si nou soufer avek li, nou pou osi ganny glorifye avek li.

Laglwar dan Lavenir

¹⁸ Mon annan sa lasirans ki sa ki nou pe soufer konmela, pa kapab ganny konpare avek laglwar ki Bondye pou revel nou dan lavenir.

¹⁹ Lakreasyon antye ki Bondye in kree pe esper avek enpasyans sa moman kan Bondye pou revele lekel son bann zanfan.

²⁰ Annefe, lakreasyon antye in tonm anba pouvwar bann lafors san valer. Pa par son prop swa, me akoz Bondye ki'n fer li soumet. Sepandan, i annan ankor en lespwar:

²¹ Sa kreasyon pou ganny libere en zour kont pouvwar destrikter ki pe gard li dan lesklavaz, pour li partisip dan laliberte ek laglwar bann zanfan Bondye.

²² Nou konnen, annefe, ki ziska aprezan, lakreasyon antye pe soupire e soufer parey en fanm ki pe akouse.

²³ Me pa zis lakreasyon: Nou ki'n deza resevwar Lespri koman premye par bann don Bondye, nou pe soupire dan nou menm, an atandan ki Bondye i pran nou koman son bann zanfan e akord nou en delivrans total.

²⁴ I vre: Nou'n ganny sove, me dan lesperans selman. Si nou war sa ki nou pe espere, sa i nepli lesperans. Annefe, personn pa esper en keksoz ki deza la.

²⁵ Me si nou esper sa ki nou pa ankor war, nou esper avek pasyans.

²⁶ Pareyman, Lespri i ed nou dan tou nou febles. Annefe, nou pa konn priye koman fodre. Me Lespri li menm i pled pour nou avek bann siplikasyon ki nou pa kapab eksprim an parol.

²⁷ Alor, Bondye ki war dan leker, i konpran sa ki Lespri i oule demande. Annefe, Lespri i priy an faver bann krwayan, parey Bondye i dezire.

²⁸ Nou konnen ki Bondye i fer tou pour byennet tou bann ki kontan li, pour tou sa bann ki i'n swazir dapre son plan.

²⁹ Annefe, tou bann ki Bondye in swazir davans, in osi deside davans pour rann zot parey son Garson. Konmsa, son Garson i vin lene parmi en kantite frer.

³⁰ Bann ki Bondye in destinen davans, i'n osi apel zot. Bann ki i'n apele, i'n osi rann zot zis devan li. Bann ki i'n zistifye, i'n osi fer zot partisip dan son mazeste.

Lanmour Bondye

³¹ Ki nou kapab dir ankor? Si Bondye i pour nou, lekel ki pou kapab kont nou?

³² I pa'n eparny son prop Garson, me i'n livre li pour nou tou. Alor, avek son Garson, i pou donn nou osi tou.

³³ Lekel ki pou akiz sa bann ki Bondye in swazir? Personn, akoz Bondye ki deklar zot non koupab.

³⁴ Alor, lekel ki kapab kondann zot? Personn, akoz Zezi-Kri li menm ki'n mor. Me anplis, i'n resisite e i lo kote drwat Bondye e i pe entersed pour nou.

³⁵ Lekel ki pou separ nou avek lanmour Kris? Ladetres, langwas, persekisyon, lafen, lanmizer, danze, lanmor?

³⁶ Lekritir i deklare: Akoz ou, nou pe ganny met anmor tou le zour. Nou ganny trete parey mouton ki pe al ganny egorze labatwar.

³⁷ Pourtan, dan tousala, nou sorti gran venker, gras a sa enn ki'n kontan nou.

³⁸ Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir,

³⁹ ni okenn pwisans, ni lao dan oter oubyen anba dan profonder, ni okenn keksoz dan lakreasyon, pa pou kapab separ nou avek lanmour Bondye dan Zezi-Kri, nou Senyer.