Romen 6 - Labib An Kreol Seselwa

Mor akoz Pese, Vivan avek Kris

¹ Ki nou pou dir alor? Eski nou pou kontinyen viv dan pese pour ki lagras Bondye i ogmante?

² Pa ditou! Pour sa ki konsern pese, nou'n mor. Ki mannyer nou kapab kontinyen viv dan pese?

³ Eski zot pa konnen ki nou tou ki'n ganny batize pour vin ini avek Zezi-Kri, nou'n ganny batize asosye dan son lanmor?

⁴ Alor, par nou batenm, nou'n ganny antere avek li dan son lanmor, pour ki, parey Kris in resisite par mazeste pwisan son Papa, nou osi, nou ava ganny en nouvo lavi.

⁵ Annefe, si nou'n ini avek li dan lanmor ki parey pour li, nou pou osi ini avek li dan rezireksyon ki parey pou li.

⁶ Konpran byen sa: Sa ki nou ti ete avan, in ganny krisifye avek Kris. Konmsa, nou lekor pese i ganny detri e nou nepli lesklav pese.

⁷ Annefe, en dimoun ki'n mor, i'n ganny libere anba pouvwar pese.

⁸ Me si nou'n mor avek Kris, nou krwar ki nou pou osi viv avek li.

⁹ Annefe, nou konnen ki depi ki Kris in resisite, i pa pou zanmen mor ankor: Lanmor nepli annan okenn pouvwar lo li.

¹⁰ Kris in mor. Son lanmor in separ li totalman avek pese enn fwa pour tou. Me aprezan ki i vivan, i viv pour Bondye.

¹¹ Se pour sa rezon ki zot osi, zot devre konsider zot koman mor pour pese, me vivan pour Bondye, ini avek Zezi-Kri.

¹² Alor, pa les pese pran kontrol lo zot lekor mortel, pour fer zot obei son bann dezir.

¹³ Pa les pese servi bann diferan parti zot lekor koman bann lenstriman pour fer sa ki mal. O kontrer, met zot lekor dan servis Bondye, koman dimoun ki ti'n mor e ki'n resisite. Met zot lekor antye dan servis Bondye pour akonpli sa ki zis.

¹⁴ Annefe, pese pou nepli annan okenn kontrol lo zot, akoz zot pou nepli viv anba Lalwa, me anba lagras Bondye.

Dan Servis Lazistis

¹⁵ Alor, eski nou ava fer pese akoz nou pa anba Lalwa, me anba lagras Bondye? Pa ditou!

¹⁶ Zot konn tre byen: Si zot met zot anba servis en dimoun pour obeir li, zot vin lesklav sa met ki zot obeir. E sa met i swa pese ki anmenn lanmor, swa lobeisans ki anmenn lazistis.

¹⁷ Me annou remersye Bondye: Avan, zot ti lesklav pese. Aprezan, zot obei avek tou zot leker, sa lansennyman ki zot in resevwar.

¹⁸ Zot in ganny libere avek pese e zot in met zot o servis sa ki zis.

¹⁹ Mon pe servi sa fason koze imen, akoz febles zot natir imen. Annefe, otrefwa, parey bann lesklav, zot ti'n soumet zot lekor avek toudsort pratik enpir e zot in viv en lavi dezord ki ti fer zot revolte kont Bondye. Me aprezan, soumet zot lekor konpletman koman bann lesklav, pour zot servi sa enn ki zis e pour anmenn en lavi ki fer plezir Bondye.

²⁰ Kan zot ti pe viv koman lesklav pese, zot pa ti enterese avek lazistis.

²¹ Me ki benefis zot ti gannyen par sa bann aksyon? Aprezan, sa bann aksyon i fer zot onte, akoz son rezilta, se lanmor.

²² Me aprezan zot in ganny libere avek pese, e zot in vin dan servis Bondye. Zot pe prodwi fri en lavi sen e son rekonpans final se lavi eternel.

²³ Annefe, lapey pour pese i lanmor, me don gratwi ki Bondye i donnen, i lavi eternel dan linyon avek Zezi-Kri, nou Senyer.