Romen 3 - Labib An Kreol Seselwa

¹ Alor, ki lavantaz en Zwif i annan? Ki litilite sirkonsizyon?

² En gran lavantaz dan tou sans: Premyerman, se avek bann Zwif ki Bondye in konfye son bann promes.

³ I vre ki serten parmi zot pa ti reste fidel. Alor, eski Bondye ava arete fidel, akoz zot in vin enfidel?

⁴ Non! Sertennman pa. Fodre rekonnet ki Bondye i azir selon laverite, menm si tou et imen i manter. Annefe, Lekritir i deklare: Ou devre ganny rekonnet vre par ou parol e ganny ou zafer si ou ganny zize.

⁵ Me si nou bann move aksyon i montre ki Bondye i zis, ki nou kapab dir? Eski Bondye i enzis akoz i pini nou? La mon pe rezonn koman en zonm.

⁶ Pa ditou! Si ti konmsa, ki mannyer alor, eski Bondye ti pou kapab ziz lemonn?

⁷ En dimoun i kapab dir: Si par mon mansonz, laverite i aparet pli kler pour montre mazeste Bondye, akoz alor, mon devre ganny kondannen koman en peser?

⁸ Alor, akoz nou pa dir parey serten i akiz nou: Annou fer sa ki mal pour fer sorti dibyen! Sa bann dimoun, zot merit ganny kondannen.

Napa Personn ki Zis

⁹ Alor kwa? Eski nou Zwif, nou pli siperyer ki lezot? Pa ditou! Mon'n deza montre ki tou dimoun i anba dominasyon pese, Zwif koman non-Zwif.

¹⁰ Annefe, Lekritir i deklare: Napa personn ki zis, pa menm en sel.

¹¹ Napa personn ki annan disernman, personn pa rod Bondye.

¹² Tou dimoun in kit bon semen; zot in tourn ver lemal. Napa personn ki fer sa ki byen, pa menm en sel.

¹³ Zot lagorz i koman en latonm ouver. Zot servi zot lalang pour tronpe. Sa ki sorti ant zot lalev, i en venen serpan.

¹⁴ Zot labous i ranpli avek malediksyon ek lanmertim.

¹⁵ Zot depese pour fer disan koule.

¹⁶ Zot les destriksyon ek maler partou kot zot pase.

¹⁷ Zot pa'n konn semen lape.

¹⁸ Zot napa respe pour Bondye.

¹⁹ Nou konnen ki tou sa ki Lalwa i dir, i dir pour sa bann ki viv anba lalwa. Konmsa, personn pa kapab ouver labous pour eskiz li, e lemonn antye ava ganny rekonnet koupab devan Bondye.

²⁰ Annefe, napa personn ki pou pas pour zis devan li akoz in obei Lalwa. Lalwa i zis permet en dimoun konnen ki i'n komet pese.

Zistifye par Lafwa dan Zezi-Kri

²¹ Me aprezan, Bondye in montre ki mannyer i rann nou zis devan li, san lentervansyon Lalwa Moiz. Lekritir ek bann profet in deza koz lo sa size:

²² Bondye i rann zonm zis devan li par lafwa dan Zezi-Kri. I fer sa pour tou dimoun ki krwar dan Kris, san distenksyon.

²³ Annefe, tou dimoun in fer pese e in perdi mazeste Bondye.

²⁴ Me dan son bonte, Bondye in rann zot zis gratwitman par Zezi-Kri ki'n delivre zot dan pese.

²⁵ Bondye in ofer Kris an sakrifis, pour ki par lanmor Kris, sa bann ki krwar dan li i ganny pardon pese. Bondye in fer sa pour montre ki i touzour zis. Annefe, i ti zis dan letan pase, kan i ti montre son pasyans. I pa ti pini zonm pour son pese.

²⁶ Me ozordi ankor i zis, akoz i oule anmenmtan azir dapre lazistis, e rann zis tou sa bann ki krwar dan Zezi.

²⁷ Alor, eski i annan ankor rezon pour nou fer vantar? Non, napa. Akoz napa? Akoz sa ki konte aprezan, se pa obei lalwa, me annan lafwa.

²⁸ Annefe, nou krwar ki en dimoun i ganny zistifye par son lafwa, me pa akoz i'n obei lalwa.

²⁹ Oubyen, eski Bondye i Bondye zis bann Zwif? Pa i Bondye lezot pep osi? Byen sir, i Bondye lezot pep osi,

³⁰ akoz i annan en sel Bondye. Par lafwa i pou rann zis devan li bann Zwif sirkonsi, e par lafwa egalman bann non-Zwif ki pa'n ganny sirkonsi.

³¹ Donk, kan nou annan lafwa, eski sa i vedir ki nou rann lalwa initil? Non! O kontrer, nou pe donn lalwa son vre valer.