Romen 2 - Labib An Kreol Seselwa

Zizman Bondye

¹ Ou! Nenport ki, ki ou ete; ou ki pas zizman lo lezot, ou napa okenn leskiz. Annefe, kan ou ziz lezot, e ki ou fer parey zot, ou pe kondann ou prop lekor.

² Nou konnen ki Bondye i ziz avek lazistis, dimoun ki fer tel aksyon.

³ Eski ou krwar ou pou sap zizman Bondye, ou ki ziz lezot, pour bann aksyon ki ou menm ou pe fer?

⁴ Oubyen, eski ou pa apresye gran labonte, pasyans ek zenerozite Bondye? Eski ou pa konnen ki labonte Bondye i devre anmenn sanzman dan ou lavi?

⁵ Me ou pa oule konpran; ou refize sanze. Pour sa rezon, ou pe anmas lo ou, en pli gran pinisyon kan Bondye pou devers lo ou son lakoler ek son zizman ki zis. Sa zour,

⁶ i pou pey sakenn dapre sa ki i'n fer:

⁷ Bann ki fer lebyen, pou ganny laglwar, loner ek limortalite.

⁸ Me i ava montre son lakoler ek son mekontantman anver bann ki revolte kont li, bann ki opoz laverite e ki ganny enfliyanse par lenzistis.

⁹ Pour dimoun ki pratik sa ki mal, pou annan soufrans ek douler, dabor, pour bann Zwif me osi pour bann non-Zwif.

¹⁰ Par kont, pou annan laglwar, loner ek lape pour tou dimoun ki pratik sa ki byen, Zwif dabor, me osi pour bann non-Zwif,

¹¹ akoz Bondye pa fer preferans pour personn.

¹² Tou dimoun ki'n fer pese san okenn konnesans Lalwa Moiz, pou mor san sibir sa Lalwa. Me tou bann ki'n fer pese avek konnesans Lalwa Moiz pou ganny zize dapre sa Lalwa.

¹³ Annefe, pa bann ki ekout Lalwa, ki ganny zistifye devan Bondye, me bann ki obei sa ki Lalwa i ordonnen, ki ganny zistifye.

¹⁴ Bann non-Zwif ki pa konn komannman Bondye me ki obei zot konsyans, zot pe montre ki zot posed sa lalwa dan zot, menm si zot pa'n resevwar bann komannman Bondye.

¹⁵ Par zot konportman, zot montre ki lalwa in ekri dan zot leker. Zot konsyans i montre ki sa i vre, e zot lespri osi i akiz zot kan zot fer sa ki mal e defann zot kan zot fer sa ki byen.

¹⁶ Dapre Bonn Nouvel ki mon prese, sanmenm ki pou arive zour Bondye, par Zezi-Kri, ava ziz tou bann panse sekre ki dan leker dimoun.

Bann Zwif ek Lalwa

¹⁷ Me ou ki port sa non Zwif, ki met ou konfyans dan Lalwa e ki fyer ou relasyon avek ou Bondye,

¹⁸ ou konnen sa ki Bondye i demann ou fer. Lalwa in montre ou ki mannyer pour ou swazir sa ki byen.

¹⁹ Ou krwar ki ou en gid pour bann aveg e en lalimyer pour bann ki dan fernwanr,

²⁰ en edikater pour bann inyoran, en ansennyan pour bann zanfan, akoz ou sir ki tou konnesans e tou laverite i dan Lalwa.

²¹ Alor, ou ki ansenny lezot, akoz ou pa ansenny ou prop lekor? Ou ki ansennyen ki fodre pa vole akoz ou vole?

²² Ou ki ansennyen ki fodre pa komet adilter, akoz ou fer li? Ou ki deteste bann zidol, akoz ou vol sa ki dan zot tanp?

²³ Ou ki fyer ki ou posed Lalwa, akoz ou dezonor Bondye e azir kontrerman avek sa ki Lalwa i ordonnen?

²⁴ Annefe, Lekritir i deklare: Se akoz zot menm, ki lezot pep i ensilte Bondye.

²⁵ Si ou obei Lalwa, sirkonsizyon i itil pour ou. Me si ou dezobei Lalwa, i parey konmsi ou pa'n ganny sirkonsi.

²⁶ Alor, si en dimoun ki pa'n ganny sirkonsi i obei sa ki Lalwa i ordonnen, eski Bondye pa pou konsider li konmsi in sirkonsi?

²⁷ Alor, sa enn ki pa'n ganny sirkonsi fizikman, me ki obei sa ki Lalwa i ordonnen, pou kondann ou, menm si ou posed Lalwa par ekri e ki ou'n ganny sirkonsi, akoz ou kas Lalwa.

²⁸ Annefe, en vre Zwif, i pa en dimoun ki annan zis laparans, e ki'n ganny sirkonsi dan en fason vizib fizikman.

²⁹ Me en vre Zwif, i sa enn ki'n sirkonsi son leker, par en sirkonsizyon enteryer ki sorti kot Lespri Bondye; pa zis eksteryer dapre Lalwa. Sa vre Zwif i ganny felisite non pa par zonm, me par Bondye.