Romen 16 - Labib An Kreol Seselwa

Konpliman Personnel

¹ Mon rekomann avek zot, Febe, nou ser ki travay koman en dyakones dan Legliz ki Sankre.

² Akey li byen, koman fodre resevwar en krwayan. Ed li dan tou fason ki i bezwen zot led, akoz i'n ed bokou dimoun, enkli mwan menm.

³ Fer salanm Prisil ek Akila, mon bann koleg travay dan servis Zezi-Kri.

⁴ Zot in riske zot prop lavi pour sov sa ki pour mwan. Pa zis mwan tousel ki rekonesan anver zot, me osi tou bann Legliz dan lemonn non-Zwif.

⁵ Fer salanm osi Legliz ki reini dan zot lakaz. Fer salanm mon zanmi Epenet premye fri pour Kris dan provens Lazi.

⁶ Fer salanm Mari ki'n donn bokou lapenn pour zot.

⁷ Fer salanm Andronik ek Zinyas, mon bann fanmir ki ti ansanm avek mwan dan prizon. Zot ganny byen estimen parmi bann zapot e zot ti'n vin kretyen avan mwan.

⁸ Fer salanm Anpliatis mon bon zanmi dan Senyer.

⁹ Fer salanm Irben, nou koleg travay pour Kris, ek Stakis mon bon zanmi.

¹⁰ Fer salanm Apeles, ki'n montre ki son lafwa dan Kris i solid. Fer salanm tou dimoun kot Aristobil.

¹¹ Fer salanm Herodyon, mon fanmir. Fer salanm tou dimoun kot Narsis ki'n aksepte Senyer.

¹² Fer salanm Trifenn ek Trifoz ki pe travay pour Senyer, ek mon bon zanmi Persid ki'n travay pour li.

¹³ Fer salanm Rifis ki Senyer in swazi, ek son manman ki osi mon manman.

¹⁴ Fer salanm Asenkrit, Flegon, Hermes, Patrobas, Hermas ek bann frer ki ansanm avek zot.

¹⁵ Fer salanm Filolog ek Zili, Nere ek son ser Olenpas ek tou bann ki'n ganny apele pour Bondye, avek zot.

¹⁶ Anbras kanmarad fraternelman. Tou bann Legliz Kris i fer zot salanm.

¹⁷ Mon demann zot, frer ek ser, fer atansyon avek sa bann ki senm divizyon ek dezord kontrerman avek lansennyman ki zot in gannyen. Evit bann tel dimoun.

¹⁸ Annefe, sa bann dimoun pa servi Kris, nou Senyer, me zot vant. Par zot bann zoli parol ek bann diskour flater, zot arive anbet dimoun ki lespri i senp.

¹⁹ Annefe tou dimoun i konn zot lobeisans pour Senyer. Sa i fer mwan plezir. Me mon ti ava kontan ti zot vin pli saz pour fer sa ki byen; plis ankor, pour evit fer sa ki mal.

²⁰ Bondye, ki donn lape, ava byento kraz Satan anba zot lipye. Lagras nou Senyer Zezi ava avek zot tou.

²¹ Timote, mon koleg travay, i fer zot salanm, ensi ki Lisiis, Zason ek Sosipater, mon bann fanmir.

²² Mwan, Tertiis ki'n ekri sa let, mon osi fer zot salanm dan Senyer ki gard nou ini ansanm.

²³ Gayis ki'n resevwar mwan se li, e kot Legliz i rasanble, i osi fer zot salanm. Erast, trezorye lavil, ek nou frer Kartis i fer zot salanm.

²⁴ Lagras nou Senyer Zezi ava avek zot tou. Amenn.

²⁵ Aprezan, annou rann glwar sa enn ki annan pouvwar pour rann zot for dapre Bonn Nouvel e dapre Zezi-Kri ki mon pe anonse, dapre revelasyon mister Bondye ki'n reste sekre pandan lontan.

²⁶ Me la aprezan, sa mister i'n ganny revele e anonse avek tou bann nasyon, par sa ki bann profet in ekri, dapre lord Bondye eternel, pour ki zot ariv dan lobeisans par lafwa.

²⁷ Nou rann glwar Bondye, ki sel i posed lasazes, par Zezi-Kri, pour touzour! Amenn.