Romen 13 - Labib An Kreol Seselwa

Relasyon avek Lotorite

¹ Tou dimoun i devre soumet li anba bann lotorite ki'n ganny etabli. Annefe, napa lotorite ki pa sorti kot Bondye, e bann lotorite ki egziste in ganny etabli par li.

² Alor, sa enn ki opoz lotorite, i opoz lord ki'n ganny etabli par Bondye, e ensi i pe atir kondannasyon lo li menm.

³ Annefe, pa dimoun ki fer dibyen, ki devre per bann ziz, me plito bann ki fer sa ki mal. Ou pa oule ganny problenm avek lotorite? Alor, fer sa ki byen e ou ava ganny felisite.

⁴ Annefe, lotorite i dan servis Bondye pour li fer ou dibyen. Me si o kontrer ou fer sa ki mal, la alor, ou devre per, akoz pa pour nanryen ki i annan pouvwar pou pini. Lotorite i la koman en serviter Bondye pour egzekit lakoler Bondye lo tou malfeter.

⁵ Alor, i bon ki ou soumet ou avek lotorite, pa zis pour evit lakoler Bondye me akoz i en devwar de konsyans.

⁶ Pour sa menm rezon ki zot pey taks, akoz lotorite ki ranmas taks, pe travay pour Bondye.

⁷ Rann tou dimoun sa ki zot merite: Ki swa taks, ki swa taks lo reveni; ki swa respe, ki swa loner, anver sa enn ki fodre.

Lanmour pour Lezot

⁸ Pa dwa personn, apar lanmour anver kanmarad; sa i sel det ki ou devret annan. Annefe, sa enn ki kontan son prosen in akonpli sa ki lalwa i demande.

⁹ Komannman ki dir: Pa komet adilter, pa fer krim, pa vole, pa anvi keksoz ou prosen. Tousala ek lezot ankor, i enkli dan sa sel komannman: Kontan ou prosen parey ou prop lekor.

¹⁰ Lanmour pa fer ditor son prosen. Ler nou kontan nou prosen nou pe akonpli lalwa konpletman.

Prepar Ou pour Retour Kris

¹¹ Zot devre konnen dan ki letan nou pe viv. Ler in arive pour zot reveye dan zot sonmey. Delivrans i pli pre avek nou ki kan nou ti krwar pour premye fwa.

¹² Lannwit in avanse, lizour pe aprose. Annou rezet bann aksyon ki ganny fer dan fernwanr e pran bann zarm ki permet konbat dan lalimyer.

¹³ Annou konport nou avek dinyite parey dimoun ki pe viv an plen zour. Annou prezerv nou kont bann move fason viv tel ki: Fer parti bwar, dezord ek vis, dispit ek zalouzi.

¹⁴ Abiy zot avek nou Senyer Zezi-Kri; pa les zot ganny antrennen par zot prop natir pour satisfer zot bann dezir.