Romen 12 - Labib An Kreol Seselwa

Nouvo Lavi dan Servis Bondye

¹ Alor, mon bann frer ek ser! Pour tou sa bonte ki Bondye in manifeste anver nou, mon ankouraz zot pour ofer zot lekor koman en sakrifis vivan, sen e agreab, devan Bondye. Sa i ava zot ladorasyon spirityel.

² Pa swiv bann koutim sa lemonn aktyel, me les Bondye transform zot e donn zot en nouvo lentelizans. Alor, zot ava kapab disern lavolonte Bondye: Sa ki byen, sa ki fer li plezir, sa ki parfe.

³ Par lagras ki, dan son bonte, Bondye in donn mwan, mon dir avek zot tou: Pa bezwen ganny en tro gran lopinyon lo zot menm. O kontrer, reste rezonnab, mezir zot valer dapre lafwa ki Bondye in donn zot.

⁴ Dan nou lekor, i annan plizyer manm e sak manm i ranpli en fonksyon diferan.

⁵ Demenm, menm si i annan bokou nou, nou form en sel lekor avek Kris, e nou tou ansanm, nou form bann manm ini, parey dan en sel lekor.

⁶ Nou posed bann diferan don dapre lagras ki Bondye in akord sakenn ant nou. Sa enn ki posed don pour profetize, i devre fer li dapre lafwa.

⁷ Si en lot i annan don servis, i devre annan lespri servis. Si enn i annan don pour lansennyman, i devre byen ansennyen.

⁸ Sa enn ki annan don pour ankouraz lezot, i devre fer li. Sa enn ki partaz son byen avek lezot, i devre fer li avek zenerozite. Sa enn ki dirize, i devre fer li byen. Sa enn ki ed malere i devre fer li dan lazwa.

⁹ Lanmour i devre senser. Deteste sa ki mal e reste atase avek sa ki byen.

¹⁰ Annan en gran lafeksyon ant zot, parey bann frer ki kontan kanmarad; setaki, montre plis respe pour kanmarad.

¹¹ Pa fer pares, me servi Senyer avek tou zot leker.

¹² Reste dan lazwa akoz zot lesperans! Gard pasyans dan lasoufrans! Reste fidel dan lapriyer!

¹³ Ed zot bann frer ki dan bezwen e pratik lospitalite.

¹⁴ Demann Bondye beni bann ki persekit zot; demann li pour beni zot, pa pour modi zot.

¹⁵ Rezoui avek sa enn ki dan lazwa, e pran lapenn avek sa enn ki dan lapenn.

¹⁶ Viv an akor avek tou zot kanmarad. Pa bezwen annan lorgey, me aksepte bann travay ki senp. Pa bezwen annan en tro gran lopinyon lo zot menm.

¹⁷ Pa rann personn mal pour mal. Me fer tou sa ki posib pour fer sa ki byen devan tou dimoun.

¹⁸ Si i posib, fer tou sa ki depann lo zot, pour zot viv anpe avek tou dimoun.

¹⁹ Mon bann zanmi! Pa fer zot prop vanzans, me les lakoler Bondye azir. Annefe, Senyer i deklare dan Lekritir: Mwan ki pou fer vanzans. Mwan ki pou fer peye.

²⁰ E osi: Si ou lennmi i lafen, donn li manze; si i swaf, donn li bwar, akoz kan ou ava azir konmsa, ou pou plas li dan en sityasyon kot i pou santi li pe brile avek laont.

²¹ Pa les lemal domin ou. O kontrer, domin lemal par lebyen.