Romen 1 - Labib An Kreol Seselwa

Konpliman

¹ Sa let i sorti kot Pol, serviter Zezi-Kri, ki'n ganny apele pour vin zapot, e ki'n ganny swazir par Bondye pour anons son Bonn Nouvel.

² Lontan davans dan Lekritir, Bondye ti'n promet sa Bonn Nouvel par lentermedyer son bann profet.

³ Sa i konsern son Garson Zezi-Kri, nou Senyer. Koman en zonm, i ti desandan lerwa David.

⁴ Me dapre Lespri Sen, i'n ganny manifeste koman Garson Bondye avek pwisans, kan i ti resisite.

⁵ Par li, nou'n resevwar lagras ek misyon koman zapot pour anmenn bann nasyon krwar dan li e obeir li.

⁶ Zot osi, zot form parti sa bann dimoun ki'n resevwar lapel Zezi-Kri.

⁷ Mon ekri zot zabitan Ronm, zot tou ki Bondye i kontan e ki i'n swazir pour viv pour li: Mon demande ki Bondye nou Papa, e Senyer Zezi-Kri i akord zot son lagras ek son lape.

Lapriyer Remersiman

⁸ Avan tou, mon remersye Bondye, par Zezi-Kri, pour zot tou, akoz lemonn antye i koz lo zot lafwa.

⁹ Bondye ki mon servi avek tou mon leker an anonsan Bonn Nouvel son Garson, i temwen ki tou sa ki mon pe dir i vre: I konnen ki mon touzour mazin zot

¹⁰ dan mon lapriyer. Mon demann Bondye ki si i son lavolonte, mon ava anfen kapab vin kot zot.

¹¹ Annefe, mon annan en gran dezir war zot pour donn zot en don Lespri Sen, ki pour rann zot for.

¹² Anplis, mon ti ava kontan prezan parmi zot, pour nou ankouraz kanmarad: Mwan par zot lafwa e zot par mon lafwa.

¹³ Mon bann frer ek ser! Mon oule ki zot konnen ki mon'n souvan fer proze pour vin war zot. Me ziska prezan, mon'n touzour ganny en lanpesman.

¹⁴ Mon konsider li mon devwar pour vizit bann zans sivilize koman bann ki pa sivilize, bann dimoun enstri, koman bann inyoran.

¹⁵ Pour sa menm rezon ki mon annan sa gran dezir vin anons Bonn Nouvel avek zot ki reste Ronm.

Pwisans Levanzil

¹⁶ Mon pa onte pour anons Bonn Nouvel. Annefe, i en pwisans ki Bondye i servi pour sov tou dimoun ki krwar: Dabor bann Zwif, answit bann non-Zwif.

¹⁷ Annefe, Bonn Nouvel i revele koman Bondye i rann bann imen zis devan li: Sa i selman par lafwa depi konmansman ziska lafen, parey Lekritir i deklare: Sa enn ki zis, pou viv par lafwa.

Lemonn I Koupab

¹⁸ Depi lesyel, Bondye i montre son lakoler kont tou pese e tou move aksyon ki zonm i fer lo later. Par zot move aksyon, zonm i anpes laverite azir.

¹⁹ Pourtan, sa ki nou kapab konnen lo Bondye i kler pour tou dimoun: Bondye li menm ki'n fer zot konnen klerman.

²⁰ Annefe, depi ki Bondye in kree lemonn, nou war pwisans eternel ek divinite Bondye; nou disern li atraver son bann mervey. Alor, zonm i san leskiz.

²¹ Zot konn Bondye, me zot napa okenn respe pour li; zot pa ni menm remersye li koman i fodre. O kontrer zot in vin konpletman fou, e zot lespri san disernman i dan teneb.

²² Zot pretann ki zot savan, me zot in vin plito fou.

²³ Olye ador Bondye dan son mazeste ki egziste eternelman, zot ador bann stati ki reprezant en zonm ki mortel, zwazo, zannimo kat lapat ek reptil.

²⁴ Pour sa rezon, Bondye in abandonn zot dan zot bann aksyon enpir, dapre move dezir zot leker. Alor, ant zot, zot sali zot prop lekor.

²⁵ Zot sanz laverite Bondye kont mansonz. Zot ador e servi kreatir olye ador Kreater ki merit ganny loue pour touzour! Amenn!

²⁶ Pour sa rezon, Bondye in abandonn zot dan zot bann pasyon ki fer onte. Menm zot fanm i sanz zot relasyon natirel pour bann relasyon kont natir.

²⁷ Pareyman, zonm osi i'n abandonn relasyon natirel avek en fanm; zot anflanmen dan lanvi seksyel ant zot. Zonm i pratik ant zonm bann aksyon ki fer onte. La rezon akoz zot ganny dan zot lekor, pinisyon ki zot merite pour zot forfe.

²⁸ Ensi, akoz zot in refize rekonnet Bondye, Bondye in les zot ale avek zot lespri deregle dan bann pratik onte.

²⁹ Zot ranpli avek toudsort mesanste, move dezir, vis, zalouzi, krim, dispit, riz, malis. Zot lans bann fo lakizasyon.

³⁰ Zot dir dimal lo kanmarad. Zot bann lennmi Bondye, ensolan, orgeye, vantar. Zot touzour pare pour envant bann nouvo fason pour fer ditor. Zot rebel anver zot paran.

³¹ Zot napa disernman, zot pa tenir zot promes. Zot leker i dir e san pitye anver kanmarad.

³² Zot konn byen zizman Bondye: Bann ki viv en tel lavi, zot merit lanmor. Pourtan, zot kontinyen komet sa bann aksyon. Anplis ki sa, zot aprouv bann ki komet sa bann aksyon.