Rit 4 - Labib An Kreol Seselwa

Boaz I Marye avek Rit

¹ Boaz ti al kot laport lavil e i ti asize. La, sa fanmir pros Elimelek, ki Boaz ti'n koz lo la, ti pase. Alor, Boaz ti dir li, “Arete, zanmi! Asiz en kou la.” Sa zonm ti aprose e i ti asize.

² Alor, Boaz ti swazir dis parmi bann ansyen dan lavil, e fer zot osi asiz.

³ Boaz ti deklar avek sa zonm ki ti fanmir Elimelek, “Naomi ki'n retournen sorti dan lakanpanny Moab, pe vann sa morso later ki ti pour nou fanmir Elimelek.

⁴ Alor, mon mazinen ki mon devre fer ou konnen, e dir ou, aste sa later dan prezans bann ansyen lavil. Si ou oule, aste li. Me si ou pa oule, fer li kler, pour mwan konnen, akoz se ou ki annan drwa aste. Apre ou, i vin mwan.” Sa zonm ti dir, “Mon pou aste sa propriyete.”

⁵ Boaz ti dir li, “Dakor, me zour ki ou aste sa morso later avek Naomi, ou devre anmenmtan pran Moabit Rit, vev sa ki'n mor, pour gard non sa defen dan son patrimwann.”

⁶ Sa zonm ti reponn, “Dan sa ka mon pa kapab aste, pangar i detri mon prop patrimwann. Preferab ou aste li; mwan mon pa kapab fer li.”

⁷ Alor, dapre koutim sa lepok an Izrael konsernan vann, oubyen fer en lesanz en propriyete: Pour konfirm en tranzaksyon, vander ti retir son sandal e donn aster. Sa ti fason pour montre ki tou tranzaksyon in ganny regle dapre koutim.

⁸ Alor, letan sa zonm ki ti fanmir pros ti dir avek Boaz, “Aste ou menm.” I ti tir son sandal.

⁹ Apre, Boaz ti dir avek bann sef lavil ek tou dimoun ki ti la, “Zot bann temwen ozordi ki mon'n aste avek Naomi tou sa ki ti pour Elimelek e tou sa ki ti pour Kilyonn ek Malonn.

¹⁰ Mon'n osi aste sa Moabit Rit, vev Malonn, pour li vin mon fanm. Dan sa fason propriyete ava reste dan fanmir sa defen, pour ki son non i kontinyen parmi son bann frer ek bann zabitan son lavil, zot tou zot temwen sa ki'n arive.”

¹¹ Apre, tou bann dimoun ki ti kot baro, ek bann sef lavil, ti reponn, “Wi! Nou temwen. SENYER i ava fer sa fanm, vin parey Rasel ek Lea, ki ansanm zot ti fer sa pep ki desandans Izrael. Ou ava vin ris dan Efrata e renonmen dan Betlehenm.

¹² SENYER ava donn ou avek sa zenn fanm en fanmir parey pour Perez, garson Zida avek Tamar.”

Desandans Boaz

¹³ Alor, Boaz ti pran Rit koman son fanm. SENYER ti beni Rit. I ti ansent e i ti ganny en garson.

¹⁴ Bann fanm ti dir avek Naomi, “Rann glwar SENYER, ki pa'n kit ou san en desandans, me ki non ou pti zanfan i ganny renonmen an Izrael!

¹⁵ I ava redonn ou lavi e nouri ou dan ou vye zour. Ou belfiy ki kontan ou, i annan plis valer pour ou ki set garson.”

¹⁶ Naomi ti pran sa zanfan, ser li dan son lebra e pran responsabilite pour elve li.

¹⁷ Bann fanm dan vwazinaz ti donn li en non: “Naomi in ganny en Garson.” Zot ti apel li Obed. Obed ti papa Zese, papa David.

Lalis bann Zanset Lerwa David

¹⁸ Aprezan la bann desandans Perez: Perez ti papa Hezronn;

¹⁹ Hezronn ti papa Ranm; Ranm ti papa Aminadab.

²⁰ Aminadab ti papa Nasonn; Nasonn ti papa Salmon.

²¹ Salmon ti papa Boaz, Boaz ti papa Obed.

²² Obed ti papa Zese, e Zese ti papa David.