Rit 1 - Labib An Kreol Seselwa

Maler dan Fanmir Elimelek

¹ Lepok ki Izrael ti ganny gouvernen par bann ziz, ti annan en lafanmin dan sa pei. En zonm Betlehenm dan Zida ti kit son pei e i ti al reste dan lakanpanny Moab, li, son fanm ek son de garson.

² Sa zonm ti apel Elimelek, son fanm ti apel Naomi, e son de garson Malonn ek Kilyonn. Zot ti sorti dan fanmir Efrata e zot ti reste Betlehenm dan pei Zida. Zot ti al reste dan lakanpanny Moab.

³ Elimelek, mari Naomi, ti mor, e Naomi ti reste avek son de garson.

⁴ Sa de garson ti swazir sakenn en fanm dan sa pei pour zot marye avek. Enn ti apel Orpa e lot Rit. Zot ti reste laba pour 10 an.

⁵ Tou le de Malonn ek Kilyonn ti mor, alor, Naomi ti retrouv li san son de garson e san mari.

Naomi ek Rit I retourn Zerizalenm

⁶ Apre sa, Naomi avek son de belfiy ti kit lakanpanny Moab, akoz i ti'n aprann ki SENYER in montre son faver anver son pep e i'n donn zot en bon rekolt.

⁷ Alor, i ti kit sa landrwa kot i ti ete avek son de belfiy, pour retourn dan pei Zida.

⁸ Selman Naomi ti dir avek son de belfiy, “Ale, zot tou le de, retourn dan lakour kot zot manman. Mon swete ki SENYER i montre son bonte anver zot parey zot in bon anver sa ki'n mor e anver mwan.

⁹ Mon priye ki SENYER i akord sakenn zot en lakour kot zot ava ere avek zot mari!” Apre sa, i ti anbras zot, me zot ti konmans plere asodlarm.

¹⁰ Zot dir li, “Non, nou pou retourn avek ou, kot ou pep.”

¹¹ Me Naomi ti dir zot, “Mon bann fiy, retournen, akoz zot oule vin avek mwan? Eski mon kapab ganny ankor zanfan pour donn zot pour en mari?

¹² Retournen, mon bann fiy, ale, al kot zot, akoz mon tro vye pour remarye. Menm si mon devre annan sa lespwar, e menm si mon remarye tanto e mon ganny zanfan,

¹³ eski zot pou espere ziska ki sa bann zanfan i vin gran? Eski zot pa pou marye avek en lot zonm? Non, mon bann fiy, mon soufrans i tro pour zot, SENYER in vir kont mwan; mon pran bokou lapenn pour zot.”

¹⁴ Apre, zot ti rekonmans plere, e Orpa li, ti anbras son belmer e i ti ale, tandis ki Rit ti reste avek son belmer.

¹⁵ Alor, Naomi ti dir avek Rit, “Gete, la ou belser in retourn kot son pep ek son bann bondye, fer parey li, retourn kot ou.”

¹⁶ Me Rit ti dir li, “Pa ensiste pour fer mwan kit ou, pour aret swiv ou. Kot ou pou ale, mon pou ale, e kot ou pou reste mon pou reste. Ou pep pou vin mon pep, e ou Bondye, pou vin mon Bondye.

¹⁷ Kot ou pou mor mon pou mor e ganny antere lanmenm. Mon demande ki SENYER i anvoy pinisyon terib lo mwan, si pa zis lanmor ki pou separ mwan ek ou.”

¹⁸ Letan Naomi ti war ki Rit ti'n determinen pour al avek li, i ti aret ensiste.

¹⁹ Alor, tou le de, zot ti repran zot vwayaz ziska Betlehenm. Kan zot ti antre Betlehenm, lavil antye ti ranpli avek leksitasyon. Bann fanm ti dir, “Sa pa Naomi?”

²⁰ Me i ti reponn zot, “Pa apel mwan Naomi, ki vedir Erez, apel mwan Mara, savedir anmer, akoz Bondye Toupwisan in rann mon lavi vreman anmer!

²¹ Mon ti al lanmen plen, e SENYER in fer mwan retourn lanmen vid. Pa apel mwan ankor Naomi. SENYER in afliz mwan e Bondye Toupwisan in anvoy maler lo mwan?”

²² Alor, Naomi ti retournen avek Rit son belfiy Moabit, sorti dan lakanpanny Moab. Zot ti ariv Betlehenm o konmansman rekolt lorz.