Psonm 99 - Labib An Kreol Seselwa

Bondye I Lerwa

¹ SENYER i lerwa. Bann pep! Tranble. Son tronn i par lao bann seriben. Later! Sekwe.

² SENYER i gran dan Zerizalenm; i domin tou bann pep.

³ Loue son non ki gran e formidab. SENYER, i sen.

⁴ Lafors en lerwa i dan lanmour ki i annan pour lazistis. Ou'n etabli ladrwatir, ou'n etabli lazistis. Ou'n etabli ladrwatir ek lazistis dan Izrael.

⁵ Loue SENYER, nou Bondye! Ador li devan son tronn! SENYER, i sen.

⁶ Moiz ek Aaron ti parmi son bann pret. Samyel osi ti parmi bann ki ti envok son non.

⁷ I ti koz avek zot dan kolonn lafimen. Zot ti gard son bann komannman ek bann lalwa ki i ti'n donn zot.

⁸ SENYER, nou Bondye! Ou ti reponn ou pep. Ou en Bondye ki ti pardonnen; me ou ti osi pini zot pour zot bann fot.

⁹ Proklanmen ki SENYER, nou Bondye i gran! Prosternen devan son montanny sen, akoz SENYER, nou Bondye i Sen.