Psonm 98 - Labib An Kreol SeselwaBondye I Gouvern Lemonn 1 Sant en kantik nouvo an loner SENYER, akoz in fer en kantite mervey; akoz son lanmen drwat ek son lebra sen in ranport laviktwar. 2 SENYER in fer konn son laviktwar; in revel son lazistis devan tou bann nasyon. 3 I rapel son fidelite ek son lanmour anver pep Izrael. Tou bann nasyon lo later in war bann laviktwar nou Bondye. 4 Tou bann zabitan later! Kriy zot lazwa pour SENYER. Kriy zot lazwa e sante. 5 Loue SENYER avek lenstriman dis lakord e avek laarp zwe bann zoli melodi. 6 Soufle tronpet e fer sonnen kor! Kriy zot lazwa devan SENYER zot Lerwa! 7 Ronfle lanmer, avek tou sa ki viv ladan! Lemonn avek tou son bann zabitan! 8 Bann gro larivyer! Bat lanmen. Bann montanny! Sant zot lazwa 9 dan SENYER ki pe vini pour ziz lemonn. I pou ziz later avek lazistis, san fer okenn preferans parmi bann pep. |
Labib An Kreol Seselwa © Seychelles Bible Society, 2013.