Psonm 97 - Labib An Kreol Seselwa

Bondye I Gran Sef

¹ SENYER i lerwa! Later i rezoui! Bann zil i dan lazwa!

² Fernwanr ek nyaz i antour li. Son tronn i fonde lo lazistis ek ladrwatir.

³ Dife i avans devan li; i bril son bann lennmi dan tou kote.

⁴ Bann zekler i ilimin lemonn; kan later i war sa, i tranble.

⁵ Bann montanny i fonn parey lasir devan SENYER ki gouvern later antye.

⁶ Lesyel i proklanm son lazistis; tou bann pep in war son laglwar.

⁷ Zot devre onte, zot ki ador zidol, zot ki fyer avek zot bann zidol initil. Tou sa bann zidol i prosternen devan SENYER.

⁸ Kan bann zabitan Zerizalenm i antann sa, zot dan lazwa e bann zabitan lavil Zida i rezoui, akoz ou bann zizman, SENYER.

⁹ Annefe, ou menm SENYER, Bondye Treo, par lao later! Ou ganny eleve par lao tou bondye.

¹⁰ Ou ki kontan SENYER! Deteste lemal. I vey lo lavi bann ki obei li; i delivre zot dan lanmen bann malfeter.

¹¹ En lalimyer pe leve pour sa enn ki obei Bondye; lazwa i ranpli leker sa enn ki pir.

¹² Ou ki obei SENYER! Reste dan lazwa. Sant bann louanz pour son non sen!