Psonm 96 - Labib An Kreol Seselwa

Bondye I Lerwa

¹ Later antye! Sant en nouvo kantik an loner SENYER!

² Sant an loner SENYER! Loue son non. Anons son delivrans zour apre zour.

³ Proklanm son grander parmi tou bann nasyon; rakont son bann mervey parmi tou bann pep.

⁴ SENYER i gran; i merite ki nou loue li. I formidab, plis ki tou lezot bondye.

⁵ Tou bann bondye lezot pep i zis zidol. Me SENYER in kree lesyel.

⁶ Laglwar ek mazeste i antour li. Son lafors ek son labote i ranpli son sanktyer.

⁷ Pep ki lo later! Rekonnet ki SENYER i gran. Rekonnet laglwar ek lapwisans SENYER.

⁸ Rekonnet laglwar ki non SENYER i merite. Anmenn zot lofrann e antre dan lakour tanp.

⁹ Prosternen devan SENYER kan i manifeste son sentete. Later antye! Tranble devan li.

¹⁰ Al anons avek bann nasyon: SENYER i Lerwa! Lemonn i solid; i pa pou bouze. SENYER i ziz bann pep avek drwatir.

¹¹ Lesyel! Rezoui. Later! Selebre. Lanmer avek tou sa ki ladan! Ronfle.

¹² Lakanpanny avek tou sa ki ladan! Rezoui. Alor, bann pye dibwa lafore ava sante avek lazwa

¹³ devan SENYER, akoz i pe vini; i pe vini pour ziz later. I pou ziz lemonn dapre lazistis e bann pep dan laverite.