Psonm 95 - Labib An Kreol Seselwa

Kantik Louanz

¹ Vini! Annou sant nou lazwa pour SENYER. Annou kriy nou lazwa pour nou Ros protekter, nou Sover!

² Annou apros li avek rekonesans! Annou kriy nou lazwa pour li avek bann kantik louanz.

³ SENYER i en gran Bondye; i en gran Lerwa par lao tou bann bondye.

⁴ I tenir bann profonder later dan son lanmen; bann latet montanny i osi pour li.

⁵ Lanmer ki i ti kree i osi pour li; later ki i ti formen avek son lanmen i osi pour li.

⁶ Vini! Annou ador li e prosternen devan li. Annou met nou azenou devan SENYER, nou Kreater.

⁷ Akoz i nou Bondye, nou, nou son pep ki i pran swen avek, son bann mouton ki son lanmen i kondwir. Ozordi, si zot ekout son lavwa,

⁸ pa andirsi zot leker parey zot ti fer Meriba, parey zot ti fer dan dezer Massa.

⁹ Laba, zot zanset ti teste mwan, menm si zot ti'n war tou sa ki mon ti'n fer.

¹⁰ Sa zenerasyon in fer mwan degout zot pandan 40 an. Mon ti dir: Zot en pep ki lespri in egare avek mwan. Zot pa konn mon semen.

¹¹ Alor, dan mon lakoler, mon ti fer sa serman: Zot pa pou antre dan mon repo.