Psonm 94 - Labib An Kreol Seselwa

Bondye I Ziz pour tou Dimoun

¹ SENYER! Ou en Bondye ki fer vanzans; Bondye vanzans! Fer konnen ki ou ete.

² Ou ki ziz later! Leve. Pini bann orgeye dapre sa ki zot merite.

³ SENYER! Ziska kan sa bann malfeter? Ziska kan bann malfeter pou kontinyen fer lafet?

⁴ Zot koz bann parol arogan; tou bann malfeter pe vant zot lekor.

⁵ Zot pe kraz ou pep, SENYER; zot fer martir sa pep ki pour ou.

⁶ Zot touy bann vev ek bann etranze; zot touy bann orfelen.

⁷ Zot dir: SENYER pa pou war nanryen; Bondye Zakob pa pou remarke.

⁸ Bann fou! Konpran sa. Kan eski zot pou konpran?

⁹ Eski sa enn ki'n fer zorey pa antann? Eski sa enn ki'n fer lizye pa war kler?

¹⁰ Sa enn ki koriz bann nasyon pa kapab pini? Pa li menm ki donn zonm konnesans. Eski i pa kapab pini?

¹¹ SENYER i konn bann proze zonm. Zot pa vo nanryen.

¹² I byennere sa enn ki ou korize SENYER e ki ou ansenny ou lalwa.

¹³ Dan letan maler, i pa trakase; i espere ziska ki lafos bann malfeter i ganny fouye.

¹⁴ SENYER pa pou abandonn son pep; i pa pou abandonn son posesyon.

¹⁵ Zizman ava reganny donnen dapre lazistis. Dimoun ki leker i drwat ava aksepte sa bann zizman.

¹⁶ Lekel ki pou leve pour defann mwan kont bann malfeter? Lekel ki pou debout pour defann mwan kont sa bann malfeter?

¹⁷ Si SENYER pa ti'n ed mwan, lontan mon ti'n fini dan simityer.

¹⁸ Ler mon ti dir: Mon lipye pe glise, ou fidelite in soutenir mwan, SENYER.

¹⁹ Ler mon leker i ranpli avek traka, ou vin rekonfort mwan.

²⁰ Ki mannyer zot kapab konplis avek sa bann ziz kriminel ki servi lalwa pour kree lanmizer?

²¹ Ki mannyer zot met zot ansanm kont dimoun onnet e kondann anmor en inosan.

²² Me SENYER in protez mwan e mon Bondye in vin mon ros protekter kot mon ganny labri.

²³ I pou fer zot pey pour zot bann krim. I pou detri zot pour zot prop mesanste. SENYER nou Bondye pou detri zot.