Psonm 91 - Labib An Kreol Seselwa

Bondye I nou Protekter

¹ Sa enn ki reste kot Bondye Treo, e repoz anba proteksyon Bondye Toupwisan,

² i kapab dir avek SENYER: Ou menm mon labri e mon fortres; ou menm mon Bondye dan ki mon'n met mon konfyans.

³ I ava delivre ou kont latrap bann saser; i ava geri ou kont lepidemi terib.

⁴ I ava kouver ou anba son lezel; ou ava ganny labri anba son bann plim. Son fidelite ava en boukliye e en zarm protekter pour ou.

⁵ Nanryen pa pou fer ou per; ni bann danze dan lannwit, ni bann dart ki ganny anvole lizour,

⁶ ni lepidemi ki rode dan fernwanr, ni bann lepidemi ki tap dan gran zour.

⁷ Mil i kapab tonbe akote ou, dis mil lo ou kote drwat; me nanryen pa pou ariv ou.

⁸ Ou ava zis gete e ou ava war pinisyon bann malfeter.

⁹ Akoz ou'n pran SENYER koman ou protekter; ou'n swazir Bondye Treo pour ou labri,

¹⁰ napa okenn fles ki pou tous ou; okenn maler pa pou apros kot ou lakour.

¹¹ Annefe, i ava donn lord son bann lanz pour protez ou partou kot ou ale.

¹² Zot ava anmenn ou dan zot lanmen pour ki ou pa konny ou lipye avek en ros.

¹³ Ou pou mars lo lyon ek serpan, ou pou kraz bann zenn lyon ek bann viper anba ou lipye.

¹⁴ Mon pou delivre sa enn ki kontan mwan. Mon pou protez sa enn ki konn mon non.

¹⁵ Kan i ava kriy ver mwan, mon pou reponn li. Dan son maler, mon pou la avek li; mon pou sov li e fer li loner.

¹⁶ Mon pou fer li viv lontan e montre li, ki mon son Sover.