Psonm 9 - Labib An Kreol Seselwa

Remersye Bondye pour Son Lazistis

Psonm David, pour sef lakoral, avek lakonpannyman lanmizik.

¹ SENYER! Avek tou mon leker mon remersye ou. Mon pou rakont tou ou bann mervey.

² Mon pou rezoui dan lazwa, mon pou loue ou non, Bondye Treo!

³ Dan ou prezans, mon bann lennmi i rekile; zot tonbe e ganny detri.

⁴ Annefe, la lo ou tronn, ou rann en zizman ki zis e ou'n donn mwan rezon.

⁵ Ou'n kraz bann nasyon etranze; ou'n detri bann malfeter e zot non in ganny efase pour touzour.

⁶ Bann lennmi in ganny detri konpletman. Zot bann lavil in ganny kraze; zot in ganny konpletman oubliye.

⁷ Me SENYER i renny pour touzour. In etabli son tronn pour li rann zizman.

⁸ I pou ziz lemonn avek lazistis; i pou ziz bann pep avek drwatir.

⁹ SENYER i en soutyen pour sa enn ki ganny meprize. I en soutyen dan letan maler.

¹⁰ Bann ki konn ou non, zot met zot konfyans dan ou. Akoz ou SENYER, zanmen ou abandonn sa enn ki vin kot ou.

¹¹ Sant pour SENYER ki renny dan Zerizalenm! Rakont son bann mervey parmi bann pep!

¹² Bondye pa oubliy lapenn bann malere. I vanz sa enn ki fer krim.

¹³ SENYER! Pran pitye pour mwan. Gete ki mannyer mon bann lennmi pe fer mwan soufer! Zis ou ki kapab delivre mwan dan lanmor,

¹⁴ pour mwan rakont devan laport Zerizalenm tou bann mervey ki ou'n fer. Mon pou danse dan lazwa, akoz ou'n delivre mwan.

¹⁵ Bann nasyon in tonm dan trou ki zot ti'n fouye; zot in pri dan latrap ki zot ti'n mete.

¹⁶ SENYER in montre ki i ete. Dan son zizman, in fer bann move dimoun pri dan zot prop latrap.

¹⁷ Bann malfeter pou al dan lemonn lanmor, parey tou bann nasyon ki oubliy Bondye.

¹⁸ Non! Bann pov pa pou touzour ganny oubliye. Lespwar bann malere pa'n perdi pour touzour.

¹⁹ Leve SENYER! Pa les bann imen pran kontrol. Anmenn bann nasyon devan ou pour zot ganny zize.

²⁰ Fer zot per ou, SENYER! Zot ava rekonnet ki zot zis bann imen.