Psonm 89 - Labib An Kreol Seselwa

En Kantik dan Letan Troub Nasyonal

Poenm Etann, en Ezrahit.

¹ SENYER! Mon pou touzour sant ou fidelite. Mon pou proklanm ou bonte dan tou zenerasyon.

² Mon deklare ki ou lanmour i egziste depi touzour; ou fidelite in ganny fikse solidman parey lesyel.

³ Ou'n deklare: Mon'n fer en lalyans avek sa enn ki mon'n swazir; mon'n promet David mon serviter:

⁴ Mon pou veye ki ou ava touzour annan enn ou desandan lo tronn.

⁵ SENYER! Lesyel i selebre ou mervey, e ou fidelite dan lasanble bann sen!

⁶ Lekel dan lesyel ki parey SENYER? Lekel parmi bann zabitan dan lesyel ki parey SENYER?

⁷ Bondye i ganny respekte dan konsey bann lanz; i gran e formidab dan son lantouraz.

⁸ SENYER, Bondye liniver! Lekel ki osi pwisan ki ou, SENYER? Ou fidelite i antour ou.

⁹ Ou menm ki kontrol lanmer dan tanpet. Ou kalme li kan son bann laroul i grosi.

¹⁰ Ou ki ti kraz Lezip parey en kadav. Avek ou pwisans ou ti fer ou bann lennmi fannen.

¹¹ Lesyel i pour ou. Later osi i pour ou. Ou ki ti kree lemonn ek tou sa ki ladan.

¹² Ou ki ti kree tou sa ki dan Nor, tou sa ki dan Sid. Montanny Tabor ek montanny Hermon i loue ou non.

¹³ Ou lebra i pwisan; ou lanmen i pwisan, ou lev ou lanmen drwat anler.

¹⁴ Lazistis ek ladrwatir i fondasyon ou tronn. Fidelite ek lwayote i mars devan ou.

¹⁵ I byennere sa pep ki konn sant zot lazwa, ki viv dan lalimyer ou prezans, SENYER.

¹⁶ Tou le zour, zot dan lazwa akoz ou non; zot redrese akoz ou zis.

¹⁷ Ou menm ki donn zot laglwar par ou pwisans; ou faver i fer zot relev latet.

¹⁸ SENYER i nou protekter; li menm ki Sen dan Izrael, li menm nou lerwa.

¹⁹ Dan en vizyon, ou ti koz avek ou bann fidel. Ou ti dir zot: Mon'n poz en kouronn lo en zonm for; mon'n fer loner en zonm ki'n ganny swazir parmi mon pep.

²⁰ Mon'n dekouver mon serviter David; mon'n konsakre li avek delwil sen.

²¹ Mon pou touzour soutenir li avek mon lanmen; mon lebra pou rann li for.

²² Lennmi pa pou kapab tronp li; bann malfeter pa pou kapab imilye li.

²³ Mon pou kraz son bann lennmi devan li; mon pou detri bann ki ay li.

²⁴ Mon fidelite ek mon lanmour pou touzour avek li; mon pou touzour fer li sorti venker.

²⁵ Mon pou donn li lotorite lo lanmer e lo bann gran larivyer.

²⁶ I pou dir mwan: Ou menm mon Papa, mon Bondye e sa Ros ki sov mwan!

²⁷ Mon pou fer li vin mon premye garson, pli gran parmi bann lerwa lo later.

²⁸ Mon pou gard mon fidelite anver li pour touzour. Mon pou respekte lalyans ki mon'n fer avek li.

²⁹ Mon pou etabli son desandans pour touzour; e son tronn pou dire osi lontan ki lesyel i egziste.

³⁰ Si son bann desandan i oubliy mon lalwa e pa swiv mon bann desizyon;

³¹ si zot vyol mon lord, e pa gard mon bann komannman,

³² alor, mon ava pini zot avek en roten e mon ava fwet zot pour zot bann fot.

³³ Me mon pa pou retir mon fidelite pour li, ni trai mon lanmour.

³⁴ Mon pa pou kas mon lalyans. Mon pa pou sanz parol ki'n sorti dan mon labous.

³⁵ Lo mon non ki sen, en fwa pour tou, mon'n fer sa serman: Mon pa pou manti avek David.

³⁶ Son desandans pou dire pour touzour; son tronn pou reste devan mwan parey soley.

³⁷ I pou en temwen fidel osi lontan ki lalin i briye dan lesyel.

Lamantasyon lo Defet Lerwa

³⁸ Pourtan, ou'n rezet lerwa ki ou ti'n swazir; ou'n les li tonbe; ou'n pran lakoler kont sa enn ki ou ti'n konsakre.

³⁹ Ou'n kas lalyans ki ou ti'n fer avek ou serviter; ou'n zet ater son kouronn e ou'n profann li.

⁴⁰ Ou'n defons tou son bann miray; ou'n demoli son bann fortres.

⁴¹ Tou dimoun ki pase i depouy li; tou bann vwazen pe gognard li.

⁴² Ou'n donn lennmi laviktwar; ou'n fer tou son bann lennmi kontan.

⁴³ Ou'n menm vir son lepe kont li; ou pa'n donn li ou sipor dan lager.

⁴⁴ Ou'n aras li son pouvwar koman en lerwa e ou'n zet son tronn ater.

⁴⁵ Ou'n rakoursi son lazenes; ou'n kouver li avek laont.

En Lapriyer pour Demann Delivrans

⁴⁶ Ankor konbyen letan SENYER, ou pou kontinyen kasyet ou? Pour touzour? Konbyen letan ou lakoler pou kontinyen flanbe?

⁴⁷ Mazin mwan! Mon lavi i telman kourt. Pour ki rezon banal ou'n kree bann imen?

⁴⁸ Lekel ki kapab viv san konn lanmor? Lekel ki kapab sape dan pouvwar lemonn lanmor?

⁴⁹ SENYER! Oli ou fidelite letan pase ki dan ou bonte ou ti promet David?

⁵⁰ SENYER! Pa oubliy ou serviter ki'n ganny ensilte. Mon port dan mon leker tou bann lensilt bann nasyon.

⁵¹ SENYER! Mazin bann repros ki lo ou serviter. Mazin sa pep ki ou'n met mwan ansarz.

⁵² Loue SENYER pour touzour. Amenn! Amenn!