Psonm 86 - Labib An Kreol Seselwa

Lapriyer pour Demann Led

Lapriyer David.

¹ Ekout mwan SENYER! Reponn mwan. Mon pov e mon malere.

² Prezerv mon lavi, akoz mon fidel anver ou. Ou menm mon Bondye! Sov mwan ou serviter ki annan konfyans dan ou.

³ Pran pitye pour mwan, SENYER! Tou le zour mon kriy ver ou.

⁴ Fer kontan leker ou serviter, akoz mon lev mon leker ver ou SENYER.

⁵ SENYER! Ou bon e ou pare pour pardonnen. Ou fidelite i gran pour dimoun ki kriy ver ou.

⁶ SENYER! Ekout mon lapriyer! Port atansyon lo mon siplikasyon.

⁷ Mon apel ou zour mon dan maler akoz ou reponn mwan.

⁸ Napa okenn bondye ki parey ou, SENYER; napa nanryen parey bann mervey ki ou'n fer.

⁹ Tou bann nasyon ki ou'n kree pou prosternen devan ou, SENYER e zot ava rann glwar ou non.

¹⁰ Ou vreman gran e ou fer bann mervey. Zis ou ki Bondye.

¹¹ SENYER! Montre mwan ou semen e mon ava mars dan ou laverite. Fer mon leker annan respe pour ou non.

¹² SENYER, mon Bondye! Mon oule dir ou mersi avek tou mon leker. Mon pou touzour glorifye ou non.

¹³ Ou fidelite anver mwan i vreman gran; ou'n sov mwan dan profonder lanmor.

¹⁴ Mon Bondye! Dimoun arogan in leve kont mwan. En group dimoun vyolan i oule touy mwan; napa okenn plas dan zot leker pour ou.

¹⁵ Me ou SENYER! Ou en Bondye ki annan konpasyon e ki pran pitye. Ou pasyan; ou fidelite e ou bonte i gran.

¹⁶ Get mwan SENYER! Pran pitye pour mwan; donn ou serviter lafors. Sov mwan, zanfan ou servant.

¹⁷ Montre mwan en siny ou labonte. Fer mon bann lennmi war e zot ava onte, akoz ou, SENYER, ou'n vin sekour mwan e ou'n konsol mwan.