Psonm 84 - Labib An Kreol Seselwa

Dezir Al dan Tanp Bondye

En Psonm.

¹ SENYER liniver! Ou tanp i donn mwan gran lazwa.

² Mon vreman anvi antre dan sanktyer SENYER. Mon leker ek mon lekor antye i anvi sant lazwa ver Bondye vivan.

³ SENYER liniver! Mon Lerwa! Mon Bondye! Menm en sren i fer son nik e bann zirondel i ganny en landrwa pour reste pre kot ou lotel, kot zot kapab met zot bann piti.

⁴ Byennere sa bann ki viv dan ou tanp e ki kontinyelman sant ou louanz.

⁵ Byennere sa bann ki pran ou pour sours zot lafors; dan zot leker i annan en semen ki al ziska Montanny Siyon.

⁶ Ler zot travers vale Beka, sa landrwa sek i vin en oazis; lapli dan son sezon i fer bann basen delo.

⁷ Zot avanse touzour pli for. Bondye ki pli gran ki tou bondye ava paret dan Siyon.

⁸ SENYER! Bondye liniver! Ekout mon lapriyer. Bondye Zakob! Ekout mwan.

⁹ Mon Bondye! Ou ki nou boukliye. Zet ou regar lo sa enn ki ou'n konsakre.

¹⁰ En sel zour dan lakour ou tanp i pli agreab ki mil zour pase dan nenport ki landrwa. Mon ti ava prefere reste devan laport sanktyer mon Bondye, plito ki viv dan latant ranpli avek malfeter.

¹¹ SENYER Bondye i nou soley e nou boukliye. I donn nou lagras ek loner. I pa refiz nanryen sa enn ki viv en lavi san repros.

¹² SENYER liniver! I byennere sa enn ki met son konfyans dan ou.